Roja Zarokan bi şahiyan hate pîrozkirin

Bi boneya Roja Zarokan a Cîhanê Rêveberiya Dibistanan a Amûdê, Desteya Jinan a kantona Firatê, Rêxistina Stêrk a Şopandina Mafên Zarokan û Rêxistina Nûdem û Weqfa Jina Azad çalakî li dar xistin.

ROJANE

20 mijdar, 2024 15:45

NAVENDA NÛÇEYAN

QAMIŞLO

Rêxistina Stêrk a Şopandina Mafên Zarokan, Rêxistina Nûdem ya Amadekirin û Geşedanên Mirovî ya Astengdaran û Weqfa Jina Azad ya Sûriyeyê bi boneya 20'ê Mijdarê Roja Zarokan a Cîhanê bi dirûşma "Bila tava kêfxweşiyê bibiriqê" li Navenda Weqfa Jina Azad a bajarê Qamişloyê şahiyeke zarokan li dar xist.

Di şahiyê de gelek zarok û malbatên wan beşdar bûn.

Di çarçoveya bernameya şahiyê de koma muzîkê ya Kulîlkên Rojava stranên xwe pêşkêş kirin û zarokan di şahiyê de govend gerand.

Her wiha her sê rêxistinan serdana zarokên nexweşiya talesîmya li Nexweşxaneya Heyva Sor a Kurd kirin û diyarî dane zarokan.

AMÛDÊ

20`ê Mijdarê Roja Zarokan a Cîhanê ye. Her sal rêxistinên têkildarî mafên zarokan çalakiyên cihêreng bi vê boneyê li dar dixin.

Rêveberiya Dibistanan a bajarê Amûdê li baxçeyên zarokan ên Sewsen û Newroz şahî li dar xistin.

Zarokan pankartên "Ji mafê min e ez biaxivim, bilîzim û fêr bibim" hildan.

TIL BIRAK

Mamosteyan bi hevkariya Komîteya Rêveberiya Dibistanan li qada dibistana şehîd Elî Sewlebî şahiyek li dar xist. Zarok û malbatên, endamên saziyên sivîl û nûnerên partiyan tev li şahiyê bûn.

Di şahiyê de zarokan şano, stran, govend û helbest pêşandan.

Di dawiya şahiyê de di navbera zarokên dibistanên Til Birakê de maçên futbolê hatin li darxistin.

DIRBÊSIYÊ

Li bajarê Dirbêsiyê li dibistana şehîd Remadan Remo şahiyek hate lidarxistin. Rêveberiya Navenda Perwerdeyê ya bajêr tev li şahiyê bû. Di şahiyê de zarokan şano û stran pêşandan.

KOBANÊ

Desteya Jinan a Kantona Firatê bi vê boneyê şahiyek li Navenda Çand û Hunerê ya Baqî Xido ya bajarê Kobanê li dar xist.

Şahî bi deqeyeke rêzgirtinê dest pê kir, dûre jî seroka Desteya Jinan a Kantona Firatê Cîhan Derwêş axivî.

Cîhan diyar kir ku bi saya şoreşa Rojava êdî ji nû ve rojeke nû li zarokan hilat û wiha domand:"Bi hêza zarokên xwe em ê siberojeke aram ava bikin."

Dûre Koma Peymangeha Vejîn, Zarokên Navenda Hêvî, Baxçeya şehîd Rîmas, Koma Hîlala Zêrîn a Dîlanê, Koma Şaho ya Çand û Hunerê, Zarokên Baxçeya Roj, zarokên malbatên şehîdan, Gulîlkên Pêşerojê, Koma Hîlala Zêrîn a Stranan şahî geş kir.

(şx/k)

ANHA