Rêveberiya Xweser dê belgeyên têkildarî komkujiya Kobanê radestî NY’yê bike

Balafireke bêmirov û biçek a dewleta Tirk a dagirker 17’ê Adarê saet di 00.40’an de li gundê Berxbotan ê Kobanê malbatek bombebaran kir û komkujiyek kir. Di encamê de ji heman malbatê piraniya wan zarok 10 kes hatin qetilkirin.

Rêveberiya Xweser der barê komkujiyê de daxuyaniyek dabû û diyar kiribû: “Em bang dikin ku lêpirsîneke navneteweyî di vê derbarê de were vekirin û dosyaya komkujî û sûcên şer ku dewleta Tirk a dagirker pêk tîne, radestî Dadgeha Ceza ya Navneteweyî were kirin.”

Têkildarî mijarê cîgirê hevserokên Meclisa Rêveber a Rêveberiya Xweseriya Demokratîk a Bakur û Rojhilatê Sûriyeyê Hemdan El Ebid ji ajansa me re axivî.

Hemdan El Ebid da zanîn ku komkujiya li Kobanê yek ji wan sûcên şer e ku dewleta Tirk a dagirker li dijî gelê Bakur û Rojhilatê Sûriyeyê pêk tîne û got: "Ev sûc berdewama siyasetên dijminatî yên dewleta Tirk û redkirina aştî û ewlehiyê ye.”

El Ebid aşkera kir ku piştî komkujiyê, Rêveberiya Xweser dest bi avêtina gavan kir û ev agahî dan: "Rêveberiya Xweser komîteyek ava kir da ku delîlan kom bike û li şahidên xwecih guhdarî bike. Armanc ji van gavan ew e ku binpêkirin werin belgekirin û radestî Neteweyên Yekbûyî û komîteyên mafên mirovan bên kirin."

Hemdan El Ebid bang li civata navneteweyî kir ku ji bo parastina sivîlan destwerdanê bikin. Her wiha bang li Neteweyên Yekbûyî û rêxistinên hiqûqî yên navneteweyî kir ku zextê li dewleta Tirk a dagirker bikin da ku sûcên xwe yên domdar rawestîne.

Cîgirê hevserokên Meclisa Rêveber a Rêveberiya Xweseriya Demokratîk a Bakur û Rojhilatê Sûriyeyê Hemdan El Ebid di dawiya axaftina xwe de got bêdengiya civata navneteweyî dewleta Tirk teşwîq dike ku sûcên zêdetir pêk bîne.

(bb)

ANHA