Reşnivîsa rêkeftina Sûriye-Îsraîlê û plana Amerîkayê ya ji bo herêmê mijarên rojnameyên erebî ne

Rojnameyên îro hatine weşandin bal kişand ser serdana Ehmed El Şeri ji Azerbeycanê re, rêveçûna dan û standina ewlehî di navbera Îsraîlê û Sûriyeyê de û plana Amerîkayê ya ji nû ve xêzkirina Rojhilata Navîn.

‘HEVDÎTINÊN NÛ YÊN YEKSER LI AZERBAYCANÊ/SÛRIYE-ÎSRAÎLÊ: PEYMAN TÊK DIÇE’

Rojnameya El Exbar a Lubnanê bal kişand ser serdana Ehmed El Şer ji Azerbaycanê re û diyar kir ku hilbijartina Azerbaycanê wek cihê dan û standinan xwedî peyameke siyasî ji bo Îranê ye. Rojnameyê destnîşan kir ku di civînan de peymana ewlehiyê ya muhtemel a di navbera Sûriye û Îsraîlê de hat nîqaşkirin, li kêleka wê jî dosyayên hebûna Îranê li Sûriyeyê, Lubnan, çekên Hizbullahê û komên Filistînê, kampên li Lubnanê, siberoja penaberên Filistînê yên Xezayê, derfeta vekirina nivîsgeha hevkariyê ya Îsraîlê li Şamê, hatin gotûbêjkirin.

‘REŞNIVÎSA RÊKEFTINA SÛRIYE-ÎSRAÎLÊ AMADE YEˊ

Girêdayî mijarê rojnameya El Mundin a Lubnanê daxuyand ku pêşketineke berbiçav di dan û standina ewlehî ya navbera hikumeta veguhêz a Sûriyeyê û Îsraîlê de heye û li gorî hin agahiyên hatine belavkirin wê di demeke nêz de der barê aliyên ewlehiyê de, bi taybet li başûrê Sûriyeyê peymanek were îmzekirin.

Li gorî çavkaniyên şopîner, dan û standin di qonaxên pêşketî de ne û li paytexta Azerbaycanê Bakuyê hevdîtineke ewlehî ya girîng, hemwextî serdana Ehmed El Şeri ji Azerbaycanê re, hat kirin.

Rojnameyê aşkera kir ku tiştên girîng di reşnivîsê û dan û standinê de hatine, pêşketina hevkariya ewlehî di navbera her du aliyan de ye, da ku aştiya sînor ji her du aliyan ve misoger bibe û li kêlek wê jî hevkariyeke ewlehî li hember gefên muhtemel were kirin.

Tel Avîv der barê van dan û standinan de diyar dike ku desthilata Ehmed El Şerî rûbirûyî 3 gefên sereke ye; gefa Îranê, gefa Hizbullahê û gefa El Heşd El Şebî ya Iraqê. Îsraîl hewl dide li hember van her sê gefan hevkariyeke ewlehî pêk bîne.

‘GEFA BARRACK A TEVLÊKIRINA LUBNANÊ BO SÛRIYEYÊ: PLANEKE AMERÎKAYÊ YA JI NÛ VE XÊZKIRINA ROJHILATA NAVÎN E LÊ TENÊ ZEXTEK E’

Rojnameya El Ereb a Londonê behsa daxuyaniyên nûnerê Amerîkayê yê ji bo Sûriyeyê Thomas Barrack kir. Barrack hişyarî dabû ku ger çekên Hizbullahê nehatin wergirtin, dibe ku Lubnan serweriya xwe winda bike û tev li Bîlad El Şamê bibe.

Rojnameyê di rapora xwe de behsa zexta Amerîkayê ya zêde ya li ser dewleta Lubnanê kir ku wê neçar bike dosyaya Hizbullahê çareser bike û di vê yekê de Washingtonê fikra "vegera Lubnanê li Bîlad El Şam" wek gefeke sembolîk bi kar anî, li kêleka wê jî dibe ku li şûna destwerdana Îsraîlê, Sûriyeyê li dijî Hizbullahê bi piştgiriya Amerîkayê, bi kar bîne.

Têkildarî helwesta Hizbullahê jî rojnameyê diyar kir ku heta Îsraîl bi tevahî ji xaka Lubnanê venekişe, ew dest ji çekên xwe bernade.

(fr)