Qurbaniyên komkujiyên Siwêdayê hatin bibîranîn

Li bajarê Siwêdayê îro bi boneya salvegera yekemîn a komkujiyên Tîrmehê (2025) ku hêzên hikumeta demkî ya Sûriyeyê pêk anîbûn, çalakiyek hat lidarxistin. 

Malbatên qurbaniyan, tevî çalakvan û koçber beşdarî çalakiyê bûn. Di çalakiyên pankart hatin vekirin û dirûşmên bi banga naskirina komkujiyê, pêkanîna edaletê û vegera ewle ya koçberan li warê xwe hatin berzkirin.

Şêniyê bi navê Beyan Îzî ku şahidekî komkujiyan e û birayê qurbaniyekî ye got, komkujî birîneke mezin di nava şêniyan de çêkir. Beyan Îzî destnîaşn kir ku komkujî ji bîra wan naçe û got bangên ji bo heqîqet û edaletê wê bidomin.

Çalakvanê bi navê Musena El Henawî jî diyar kir ku şopên komkujiyên Tîrmehê hîna xuya ne û got, salek derbas bû, lê bi hezaran koçber nekirin vegerin malên xwe.

El Henawî banga dîtina çareseriyekê ji bo vegera  şêniyan a li gund û bajarokên xwe, aşkerakirina aqûbeta windahiyan, çareserkirina bandorên kuştin û koçberkirinê kir. Her wiha anî ziman ku hejmarek zêde ya kesên winda û gorên komî hene.

Çalakvanan diyar kirin ku xebatên wan ên belgekirina binpêkirinan didomin û xwestin hesab ji berpirsên komkujiyan were pirsîn û koçber bi ewle vegerin warê xwe.

(bb)