‘Pêwîstiya Sûriyeya pêşerojê bi destûreke demokratîk heye’

Şêniyên bajarê Girkê Legê yê kantona Cizîrê destnîşan kir ku pêwîstiya qonaxa bê ya Sûriyeyê bi çareseriyên bingehîn heye ku ew jî bi rêya sazkirina destûreke pirreng û sîstemeke demokratîk pêk tê.

Hevserokê Desteya Malbatên Şehîdan a kantona Cizîrê Mihemed Cemîl got tunebûna îtîrafeke destûrî bi mafên Kurdan û paşguhkirina herêmên wan bû yek ji sedemên krîzên li Sûriyeyê û got: “Divê di destûra nû ya Sûriyeyê de mafên siyasî, çandî û civakî yên Kurdan û pêkhateyên din misogerkirî bin.”

Cemîl wiha domand: "Her destûrek ku ne li gorî pirrengiya Sûriyeyê be û maf û azadiyan bi awayekî wekhev misoger neke, nikare aramiyê pêk bîne. Ji bo rêvebirina Sûriyeyê di qonaxa bê de sîstema demokratîk a pirreng nimûneya herî guncaw e.”

Welatî Hemrîn Cangîr jî teqezî bi misogerkirina mafên jinan di destûrê de û beşdariya wan di jiyana siyasî û civakî de da û got: "Misogerkirina mafên jinan bingeha avakirina Sûriyeya demokratîk e."

Hemrîn Cangîr teqezî bi rêzgirtina ji pirrengiya neteweyî û olî re û misogerkirina mafên hemû pêkhateyan di destûrê de, da.

Welatî Metîn Elî jî diyar kir ku ji bo Sûriyeya pêşerojê destûreke demokratîk ku mafên Kurdan û hemû pêkhateyên neteweyî û olî yên din misoger bike, pêwist e.

Elî got îtîrafa destûrî ya bi mafên pêkhateyan dikare dewleteke bi edalet û wekhevî ava bike û paşguhkirina bi deh salan bi dawî bike. Elî di dawiya axaftina xwe de got bê destûreke giştî pêşeroja Sûriyeyê rast nabe, her wiha bi destûreke giştî nakokî bi dawî dibin û pêşî li hevbeşiyê tê vekirin.

(mh)

ANHA