MSD‘ê sersaxî ji malbatên qurbaniyên teqîna li Şamê re xwest

Meclisa Sûriyeya Demokratîk (MSD) têkildarî teqîna li Şamê ya di hundirê qehwexaneyekê de ku di encamê de hejmarek sivîl hatin kuştin û hin birîndar bûn daxuyaniyek nivîskî weşand.

MSD‘ê bûyer wekî ‘‘binpêkirineke mezin li ser ewlehiya welatiyan û silametiya wan‘‘ bi nav kir û diyar kir ku "Terorî bi hemû cûreyên wê û çavkaniyên wê hîna jî gefeke rasterast li ser aramiya Sûriyeyê û siberoja gelê wê çêdike."

MSD‘ê sersaxî ji malbatên qurbaniyan re xwest û şîfaya lezgîn ji birîndaran re hêvî kir û wiha domand: " Sepandina ewlehî û aramiye li seranserî Sûriyê pêşaniyek neteweyî ye. Têkoşîna li dijî terorê û jiholêrakirina çavkaniyên wê, berpirsyariyeke kolektîf e. Ji bo parastina canê sivîlan û yekparbûna welat û aramiya wê, pêdivî bi yekgirtina hemû hewildanên neteweyî ya dûrî her şêweyên tundûtûjî û radîkalîzmê heye."

 MSD‘ê destnîşan kir ku ku mafê gelê Sûriyeyê heye bi ewle û azad û rûmet  bijî. Da zanîn ku avakirina Sûriyeyeke aram û bi ewle tenê bi serweriya yasayê, xurtkirina nirxên dadmendî û aştiyê û redkirina terorê bi hemû şêwe û rûyên wê pêkan e.

MSD‘ê di dawiya daxuyaniyê de banga parastina sivîlan û spandina ewlehiyê kir. Her wiha piştgiriya xwe bi malbatên qurbaniyên teqînê re ragihand û diyar kir ku têkoşîna li dijî terorê berpirsyariyeke nîştimanî ya tevkar e.

(bb)