Mocteba Xameneyî bû Rêberê Bilind ê nû yê Îranê

Meclîsa Pisporan a Îranê Mocteba Xameneyî wekî Rêberê Bilind ê nû yê welêt hilbijart.

9 adar, 2026 09:29

NAVENDA NÇEYAN

Meclîsa Pisporan a Îranê ragihand ku wê Mocteba Xameneyî wekî Rêberê Bilind ê nû yê welêt hilbijartiye, li şûna bavê wî, Elî Xameneyî, ku roja Şemiyê, 28`ê Sibatê, di êrişeke asmanî ya Amerîka-Îsraîlê de hatibû kuştin.

Meclîsê bang li gelê Îranê kir ku "yekitiyê biparêzin û soza dilsoziya xwe bidin Rêberê Bilind ê nû", û diyar kir ku "ev biryar di rûniştineke awarte de bi piraniya dengan a endaman hatiye dayîn."

Mocteba Xameneyî kî ye?

Mocteba Huseynî Xameneyî di 8ê Îlona 1969`an de li Meşhedê, bakur-rojhilatê Îranê ji dayik bûye. Ew kurê duyemîn ê Rêberê Bilind ê berê Elî Xameneyî ye.

Piştî damezrandina Komara Îslamî di sala 1979`an de, ew di hawîrdorek olî û siyasî de mezin bûye. Wî perwerdehiya xwe ya destpêkê li Tehranê wergirtiye, paşê di sala 1999`an de çûye Qumê da ku li medreseyê xwendina olî bidomîne, li wir wî zanistên Îslamî xwendiye. Di ciwaniya xwe de, ew wekî beşek ji hêzên Besîc beşdarî Şerê Îran û Iraqê bû.