Li Şamê bi boneya Cejna Zimanê Kurdî çalakiyek hat lidarxistin

Bi boneya Cejna Zimanê Kurdî (15 Gulan) Komeleya Osman Sebrî ya Çandê bi dirûşma `Zimanê me mafê me yê rewa ye, zimanê me nasnameya me ye` çalakiyek bi rêxistin kir. 

Çalakî li Qehwexaneya Tirasat El Rebwa ya Şamê hat organîzekirin. Şandeyeke Rêveberiya Xweser, endamên Meclisa Sûriya Demokratîk (MSD), Kombûna Jinan a Zenûbiya, Partiya Yekitiya Demokratîk (PYD), Kurdên li Şamê dimînin, siyasetmedar û rewşenbîr beşdarî çalakiyê bûn.

Çalakiyê bi rêzgirtinê dest pê kir. Piştî wê hevserokê PYD`ê Xerîb Hiso axivî û got Cejna Zimanê Kurdî ji bo gelê Kurd rojeke dîrokî ye.

Hiso hemû nivîskar û rojnamevan û wêjevanên ku zimanê kurdî parast û bi pêş xist, bi bîr anîn û hemû rêveber, têkoşerên Kurd û bi taybet Rêber Abdullah Ocalan ku gelekî girîngî da zimanê kurdî, silav kirin.

Hiso got: “Heke civak zimanê xwe pêş bixe, pêş dikeve, ji ber vê yekê divê hemû civak zimanê xwe biparêzin. Gelê Kurd li Rojava û Sûriyeyê bi zimanê xwe yê kurdî doza xwe xiste rojeva tevahiya cîhanê û ev yek bi nirx e. Divê em zimanê xwe biparêzin.''

Di çalakiyê de beşdaran diyar kir ku zimanê kurdî maf û nasnameya gelê Kurd e, divê were xurtkirin û parastin.

Her wiha di çalakiyê de helbest hatin xwendin, stran û govend hatin pêşkêşkirin. Di dawiyê de xelat li şagirtên zimanê kurdî belav kirin.

(np)

ANHA