Li Reqayê 79 rê hatin qîrkirin

Şaredariya Gel a Kantona Reqayê projeya herî mezin a qîrkirina rêyan 5ˈê Hezîrana îsal dabû destpêkirin. Qîrkirina rêyan 9ˈê Mijdarê bi dawî bû û bi qasî 31 hezar metredam rê hat qîrkirin.

Rêyên Kolana Nûr, Qewetlî, Kolana Stadyuma Belekî, Kolana Îhsan a li Taxa Mimêla, rêya ji Kolana Saqiye heya Sûka Sewalan, rêya di navbera Çerxerêya El Berazî heya Sînaa de bi dirêjahiya hezar û 100 metreyî hatin qîrkirin.

Her wiha rêya di navbera Parka Bedya û Kolana Qîtar de, dîsa rêyên şaxî yên Kolana Seyf Eldewle heya Kolana El Mensûra û Taxa El Hesûn hatin qîrkirin. Bi giştî 20 rêyên şaxî û yên derdora Çerxerêya El Neîm hatin qîrkirin.

Şaredariyê rêya Bazara Sebzeyan a kevn, rêya Kornêş a li rojhilatê kantonê, rêya şaxî ya taxa Sexanî heya Bazara Sebzeyan a kevn, rêya şaxî ya li bakurê rojavayê Çerxerêya Delê qîr kirin. Her wiha rêya Konêş a rojhilat (Ji Bazara Hedîdî heya benda kontrolê ya Mişleb a li aliyê rojhilatê bajar) bi dirêjahiya 4 kîlometreyan hat qîrkirin. Dîsa jî kolana Qewetlî ya di navbera Çerxerêya Saetê ya li aliyê rojava heya Xaçerêya Ebû Omer a li aliyê rojhilat bi dirêjiya 2 kîlometreyan hat qîrkirin.

Endezyar Mehmûd El Hemam ku li ser xebatên qîrkirina rêyan disekine, diyar kir ku Şaredariya Gel a Reqayê qîrkirina rêyên sereke û yên şaxî ku di plansaziya îsal de hatibûn diyarkirin, bi dawî kir û bi giştî 79 rê hatin qîrkirin.

El Hemam da zanîn ku rêyên nehatine qîrkirin jî xistine plansaziya sala 2025ˈan.

(bb)

ANHA