Li Qamişlo û Çilaxa av derbasî malan bû, li Tirbesiyê jî zerar li çandiniyê bû

Ji ber barana dijwar ku ji duh ve dewam dike li bajarên Qamişlo û Çilaxa avê da ser gelek malan. Li Tirbespiyê zerarek mezin li zeviyên çandinyê bû.

CIVAK Û JIYAN

15 adar, 2026 13:09

QAMIŞLO

Li herêma Cizîrê ji duh ve baraneka dijwar dibare. Di encamê de av li kolanan kom bûye û kanalîzasyonên herikîna avê hatine girtin.

Li bajarê Qamişloyê, bi taybetî li taxên Cûdî û Cemayê avê daye ser gelek malan.

Şênyên taxan diyar kirin ku ev pirsgirêk her demsala baranê dubare dibe û dane zanîn ku sedema vê yekê torên kanalîzasyonê yên girtî ne û ji 27 salan zêdetir nehatine nûkirin.

Li bajarê Tirbespiyê jî ziyeneke mezin li cotkarên sebzeyan bûye. Sebzeyên pêşwext ku di kortikan de hatibûn çandin li ber avê çûn û bi dehan donim erd wêran bûn.

Li bajarê Çilaxa jî, ava baranê li kolanan kom bû û ket nav hin malan. Her wiha tevgera şêniyan asteng kir.

Li ser banga şêniyan û ji bo hêsankirina herikîna trafîkê, Komîteya Rewşa Awarte û Daîreya Xizmetguzariyê ya Şaredariya Gel bi lez kanalîzasyonên ji ber barana zêde hatibûn girtin paqij kirin û rêya herikîna avê vekirin.

(k)