Li Qamişlo çalakiya bi boneya Roja Azadiya Rojnamevaniyê ya Cîhanê

Yekitiya Ragihandina Azad (YRA) û Yekitiya Rojnamevaniya Erebî ya Navneteweyî bi boneya Roja Azadiya Rojnamevaniyê ya Cîhanê (3'yê Gulanê) çalakiyek li dar xist. Di çalakiyê de rojnamevan û nûnerên saziyên ragihandinê û saziyên sivîl ên Herêma Bakur û Rojhilatê Sûriyeyê beşdar bûn.

Çalakî li Navenda Çand û Hunerê ya Mihemed Şêxo ya bajarê Qamişlo li dar ket.

Di çalakiyê de komîteya amadekar û rojnamevanên beşdar peyam xwendin.

Cîgirê serokê Yekitiya Rojnamevaniya Erebî ya Navneteweyî  Hesen Zaza keda ku ji bo diyarkirina rastiyê tê dayîn silav kir. Her wiha tecrûbeya Rêveberiya Xweser a pêşxistina ragihandinê û belavkirina fikrê neteweya demokratîk ê ku mafên hemû pêkhateyan misoger dike, silav kir.

Endama Desteya Rêveber a YRAˊyê Evîn Îbrahîm rojnamevanên şehîd bûne bi bîr anîn. Evîn kedên li Bakur û Rojhilatê Sûriyeyê yên ji bo aşkerakirina hovîtiya dewleta Tirk a dagirker silav kirin û bang li rayedarên PDKˊê kir ku rojnamevan Silêman Ehmed berdin.

Her wiha rojnamevan Ehmed Mihemed ê edîtorê ajansa me diyar kir ku siyaseta bêdengkirina rojnamevanan li seranserî cîhanê didome û soza şopandina rêya hevrêyên xwe nû kir.

Li dawiyê Hesen Zaza 16 rojnamevan ji wan edîtorên ajansa me Ehemd Mihemed û Ekrem Berekat û saziya ragihandinê ya Suryanî ya Soryoo xelat kirin.

(mh)

ANHA