Li Kobanê berhevkirina zeytûnan dest pê kir

Komkirina zeytûnan li Kobanê di navbera mehên Cotmeh û Mijdarê de piştî barana yekem a payîzê dest pê dike. Zeytûn û zeyta zeytûnê ji bo bi hezaran malbatan li Kobanê û gundewarên wê çavkaniyeke sereke ya debarê ne.

Lê ji ber bihabûna sotemeniyê bandoreke neyînî li cotkarên zeytûnan kir û piraniya cotkaran nekarî zeviyên xwe û darên zeytûnê di dema xwe de av bidin.

Cotkarê bi navê Ehmed Xelîl Mislim ê ji gundê Holaqî ku zeytûnên xwe berhev kirine û anîne guvaşgehê, der barê rewşa îsal de diyar kir ku ji ber bilindbûna buhayê mazotê, nekariye darên xwe av bidin.

Mislim bal kişand ser girîngiya xizmeta daran û destnîşan kir ku darên zeytûnê hewceyî xizmetê ne.

Xwediyê guvaşgeha zeytûnan a li gundê Nordan Henîfî Şahîn jî got: “Îsal ji ber bihabûna mazotê, hilberîn li gorî salên borî gelekî kêm bûye û daketiye nêzî ji sedî 60’ê berhemên zeytûna îsal.”

Şahîn bal kişand ser rewşa cotkaran û got: “Cotkarên me di rewşeke dijwar de ne, gelek ji wan nikarin heqê guvaşgehê bidin, lewma em neçar dibin heqê xwe bi zeytê bistînin. Niha em û cotkarên Efrînê wekî hev nabin, lê li Efrînê rêjeya berhemê zêdetir e û cureya daran çêtir e, lê li Kobanê hilberîn di asteke pir kêm de ye.”

Hanîfî Şahîn bang li aliyên peywendîdar kir ku mazotê ji bo guvaşgehê peyda bikin û buhayê mazotê kêm bikin.

(so)

ANHA