Li Hesekê, Hol û Şedadê çalakiyên bi boneya 8’ê Adarê

Di çarçoveya lidarxistina rêzeçalakiyên bi boneya roja 8’ê Adarê de ku bi diruşma "Bi felsefeya Jin, Jiyan, Azadî ber bi Sûriya demokratîk ve" Kongra Star rêzeçalakî li bajarên Hesekê, Hol û Şedadê yên kantona Cizîrê organîze kirin.

DER BARÊ TÊKOŞÎNA JINAN DE PANELEKE DIYALOGÊ

Kongra Star li Parka Xwendinê ya li Til Hecerê ya Hesekê bi armanca nîqaşkirina rola jinan, fedekarî û destkeftiyên wan ên dîrokî panelek li dar xist.

Di panelê de endama Koordînasyona Kongra Star a Hesekê Alaa Hemdîş axivî û mijarên sereke yên panelê diyar kirin.

Mijara yekemîn a bi sernava "Jin di navbera demokrasî û azadiyê de" ji hêla endama Koordînasyona Kongra Star a Hesekê Nahid Silêman ve hat birêvebirin. Nahid diyar kir ku jinan kedeke mezin di serdeman de ji bo bidestxistina azadiya xwe da.

Nahid wiha domand: "Ji bo ku em jinan derbasî nava tevahî aliyên jiyanê bikin me têkoşîneke mezin da. Rola jinan di têkbirina çeteyên DAIŞ’ê de ya herî girîng bû."

Di mijara duyemîn a bi sernava "Jin di aliyê leşkerî de" ji hêla endama Hêzên Ewlekariya Hundirîn-Jin Sara Hîlal axivî û diyar kir ku jin li Bakur û Rojhilatê Sûriyeyê bi rêya berxwedana xwe ya li hember çeteyên DAIŞ’ê xwe ji tevahî cîhanê re îsbat kir."

Sara anî ziman ku damezrandina Yekîneyên Parastina Jin (YPJ) û Hêzên Ewlekariya Hundirîn-Jin di dîroka jinan de girîngiyeke mezin bû û li hemberî xeteriyên ewlehî û leşkerî yên mezin bi ser ket.

Di dawiya panelê de beşdaran nîqaş kir û diyar kir ku divê mafên jinan di destûrê û Hevpeymana Civakî ya pêşerojî li Sûriyeyê de hebe ku edalet û wekhevî were misogerkirin.

LI HESEKÊ Û HOLÊ XEMILANDINA KOLANAN

Di heman çarçoveyê de Kongra Star kolan û taxên Hesekê bi alên Konra Star, wêneyên Rêber Abdullah Ocalan û wêneyên jinên di oxira azadiyê de xwe feda kirine, hatin xemilandin. Taxa Til Hecer, Qada Azadiyê hatin xemilandin.

Hemwextî wê jinên ji bajarê Holê jî bi beşdariya komîteyên saziya kehrebê û endamên ciwanên şoreşger kolan û têketina sereke ya bajêr xemilandin.

Der barê mijarê de rêvebera Kongra Star a Holê Bedriye El Hisên axivî û got: "Em ji bo pîrozbahiyên 8’ê Adarê kolan û taxan dixemilînin."

Bedriye wiha domand: "Em 8’ê Adarê li tevahî jinên li Bakur û Rojhilatê Sûriyeyê û cîhanê pîroz dikin û soza xwe ya şopandina rêya ber bi pêkanîna edalet û wekheviyê dubare dikin."

NAVENDA ÇAND Û HUNERÊ LI ŞEHDADÊ HAT VEKIRIN

Bi beşdariya nûnerên ji saziyên sivîl, komîte û partiyan û bi boneya 8’ê Adarê li bajarê Şedadê yê başûrê kantona Cizîrê navenda Çand û Hunerê hat vekirin.

Di merasîma vekirinê de endama navenda Şedadê Rewda El Hemed axivî û bixêrhatina beşdaran kir û got: "Wê ev navend ji bo parastina mîrasa çandê û xurtkirina nasnameyê bibe qadeke girîng."

Rêvebera Kongra Star Emîra El Seed jî got: "Em vê rojê li tevahî jinên li Bakur û Rojhilatê Sûriyeyê û cîhanê pîroz dikin."

Her wiha rêveberê Meclisa Sivîl a Şedadê Hesen El Muslif got: "Vekirina vê navendê hemwextî roja 8’ê Adarê ew e ku ev navend rola çand û hunerê di avakirina civakê de bi pêş bixe."

Pîrozbahî bi çalakiyên hunerî û dîlanan bi dawî bû.

(fr)

ANHA