Li herêma Firatê merasîmên sersaxiyê yên 3 şehîdan

Îro bi sedan şêniyên herêma Firatê beşdarî merasîmên sersaxiyê yên şervanên QSD`ê Berçem Kobanê (Ednan Şêx Mihemed), Dozvan Qasimê (Serwet Ehmed ) û endamê Hêzên Ewlekariya Hundirîn Mihemed (Mihemed Şêx Nebî) bûn.

Şervanên QSD`ê Berçem Kobanê û Dozvan Qasimê 20`ê Cotmehê dema li gundewarê Kobanê erka xwe pêk dianîn di encama qezayê de şehîd bibûn. Endamê Hêzên Ewlekariya Hundirîn Mihemed Şêx Nebî jî 18`ê Cotmehê li Kobanê şehîd bibû.

Konê sersaxiyê yê şehîd Berçem Kobanê li gundê Berx Botanê, yê şehîd Dozvan Qasimê li gundê Qasimê, yê şehîd Mihemed jî li gundê Çolbegê yê girêdayî bajarê Kobanê hatin danîn.

Merasîmên sersaxiyê bi rêzgirtinê dest pê kirin.

Di merasîma şehîd Mihemed de endamê Hêzên Ewlekariya Hundirîn a herêma Firatê Mihemed Qaso axaftin kir. Qaso sersaxî ji malbata şehîd re xwest û soz da ku ew ê heta pêkanîna armancên şehîdan, rêya wan bişopînin.

Di merasîma şehîd Dozvan Qasimê de jî endamê Rêveberiya Akademiya Şehîd Emgîhan Cûdî, Silêman Silêman axivî. Silêman sersaxî da malbata şehîd û diyar kir ku malbatên şehîdan dest ji pêkanîna armancên zarokên xwe bernadin.

Di merasîma şehîd Berçem Kobanê de jî endamê Meclisa Giştî ya Partiya Yekîtiya Demokratîk (PYD) Ehmed Xoce axivî. Xoce bal kişand ser sedsaliya peymana Lozanê, siyasetên qirkirinê yên dijî gelê Kurd, derketina tevgera azadiyê ya Kurdistanê û Şoreşa Rojavayê Kurdistanê.

Merasîm bi dirûşmeyên dilsoziya bi şehîdan re bi dawî bûn.

(eş/c)

ANHA