Li hember dagirkeriya Tirk banga hevgirtin û berxwedanê

Êrişên dagirkeriyê yen dewleta Tirk a dagirker û çeteyên wê yên li ser Bakur û Rojhilatê Sûriyeyê dewam dikin. Hêzên navneteweyî jî li hemberî van êrişan bêdeng in.

Planeke herêmî û bêdengiya naveteweyî

Şêniyê bi navê Mihemed El Xetîb ê ji bajarê Dirbêsiyê diyar kir ku êrişên li ser Herêma Bakur û Rojhilatê Sûriyeyê bi tevakarî û planeke di navbera hêzên navneteweyî de tên kirin.

Mihemed El Xetîb bal kişand ser berxwedana gel jî û ev li gotinên xwe zêde kir: "Berxwedana pêkhateyên herêmê gelekî mezin e, ji ber vê yekê dewleta Tirk bi rêya êrişên domdar û koçberkirinê hewl dide berxwedanê têk bibe.

Mihemed El Xetîb bi bîr xist ku dewleta Tirk a dagirker li Efrîn, Şehba û Serêkaniyê bi hezaran kes ji malên wan koçber kirin, lê dîsa jî bexwedana pêkhateyên herêmê bi birydardarî û israr dewam dike.

Derya Mihemed a ji kantona Efrînê jî koçber bûye wiha got: "Em bi silametî li ser erdê xwe diyan, lê dewleta Tirk a dagirker bi 72 balafiran êrişên hovane li dijî me pêk anîn, ji ber vê em neçar mane malên xwe biterkiînin. Li pêşiya çavê cîhanê binpêkirin li dijî me hatin kirin û em çend caran hatin koçberkirin, lê rêxistinên navneteweyî dengê xwe nekirin. Ma gelo rola van rêxistinan çi ye."

Ezîz Hesen ê koçber jî destnîşan kir ku êriş û zulma li dijî koçberên kantona Efrîn-Şehbayê hatiye kirin li dijî tu kesî çênebûye û got: "Çeteyan erdê me, malên me dizîn û darên me talankirin."

Ezîz Hesen anî ziman ku ku pêkanînên li Efrînê binpêkirineke dijwar li peymanê navneteweyî ne û bang li rêxistinên mirovî kir ku êrişê û sûcên dewleta Tirk a dagirker ên li dijî gelan rawestînin.

HEVGIRTIN Û BERXWEDANA GEL

Ji bajarê Dirbêsiyê jî welatiya bi navê Seîde Ehmed bal kişand ser girîngiya yekitiya gel li hember van êrişan û der barê pêşwazîkirina koçberên Efrîn û Şehbayê de got: "Em bi gelê xwe re hevgirtî ne û hêza xwe ji felsefeya neteweya demokratîk û fikra Rêber Abdullah Ocalan werdigirin. Em li hember şerê taybet ên bi armanca derbekirina vîna me disekinin."

Seîde diyar kir ku rêya pêkanîna serkeftinê şerê gel ê şoreşgerî ye û bang li tevahî welatiyan kir ku dakevin qadan û welat ji êrişan biparêzin.

Welatiyê bi navê Ebdulbaqî Ebdurehman ê ji heman bajarî jî bal kişand ser girîngiya hevgirtina civakî li hember van zehmetiyan û got: "Çanda hevgirtin û pêşwazîkirina koçberan nîşaneya ruhê biratiyê derdixe pêş."

Ebdurehman di dawiyê de axivî û wiha got: "Dewleta Tirk a dagirker hewl dide şêniyên resen koçber bike û guhartina demografîk ferz bike. Lê em ê berxwedanê û sekna xwe bi Rêveberiya Xweseriya Demokratîk re dewam bikin ku nasname û xaka xwe biparêzin."

(fr)

ANHA

HESEKÊ

Dirbêsiyê