Li Eyn Îsayê navenda astengdaran hat vekirin

Komîteya Kar û Barên Mirovî û Xebatê ya Meclisa Bajarê Girê Spî bi merasîmekê navendeke astengdaran vekir.

Navend li bajarê Eyn Îsayê bi amadebûna endamên Desteya Kar û Barên Civakî û Xebatê ya Kantona Firatê, endamên Meclisa Bajarê Girê Spî tevî astengdaran û malbatên wan hat vekirin.

Piştî vekirina navendê, hevseroka Desteya Kar û Barên Civakî û Xebatê ya Kantona Firatê Hêlîn Hacim axivî. Hêlînê diyar kir ku Rêveberiya Xweser tevî hemû zehmetiyan jî xizmeta welatiyan dike û ev navend vekir.

Cîgirê Hevserokatiya Meclisa Bajarê Girê Spî Hezai Mihemed jî anî ziman ku ev navend dê xizmeteke berfireh pêşkêşî şêniyên gundewarê bajarê Girê Spî û Eyn Îsayê bike. Hezai got, tevî êrişên li ser herêmên Eyn Îsayê jî ew ê xizmeta gel berdewam bikin.

Piştî axaftinan Koma Şehîd Hevrîn Xelef a Zarokên kampa koçberên Girê Spî çalakiyeke hunerî li dar xist.

Têkildarî xebatên navendê rêvebera Komîteya Kar û Barên Civakî û Xebatê ya Meclisa Girê Spî Îman Îbrahîm ev agahî dan: "Armanca me ji vekirina vê navendê  tenê tedawiya fîzîkî nin e, lê belê beşekî  ji bo perwerdeyên kombuter, fêrkirina xwendin û nivisandinê heye. Her wiha dê dewreyên fêrkirina dirûtinê jî werin vekirin. Ev hemû dê karibin mirov pêş bixin û ji bandorên dirûnî xilas bikin."

Li gorî hatibû plankirin, diviya ev navend berî 2 salan hatiba vekirin, lê ji ber êrişên dewleta Tirk a dagirker û çeteyên wê çend caran hat taloqkirin.

(bb)

ANHA