Li Dirbêsiyê li dijî tundiyê panel

Kongra Star a bajarê Dirbêsiyê yê kantona Cizîrê li gundê Cirêbe yê bajarokê Sêgir ê Dirbêsiyê bi beşdariya jinan û endamên Kongra Star bi diruşma ˋLi dijî tundiyê û komployan, Jin, Jiyan, Azadîˋ paneleke diyalogê li dar xist.

Di panelê de du mijaran; Civaka xwezayî û şêweyên tundiya li dijî jinan û rêbazên têkoşîna li dijî tundiyê hatin nîqaşkirin.

Axaftina destpêkê ji hêla rêvebera Kongra Star a Dirbêsiyê Fatme Keleş ve hat kirin. Fatme wiha got: "Dem hatiye ku qeyd û bendên li dijî jinê hatine çêkirin werin şikandin."

Fatme wiha domand: "Jin li Bakur û Rojhilatê Sûriyeyê ji bo bidestxistina azadî, pêkanîna edalet û wekheviya civakî bi saya fikir û felsefeya Rêber Abdullah Ocalan, tê dikoşin."

Piştre endama Meclisa Bajarokê Sêgir Reca Mihemed mijara yekemîn a li ser ˋcivaka xwezayîˋ û rola jinan di vedîtin û pêşxistina rêbazên jiyanê ji kev heta roja îro de nîqaş kir.

Rêvebera Kongra Star a bajarokê Sêgir Leyla El Elî mijara duyemîn a li ser tundiya li dijî jinan di civakan de û şêweyên tundî û bandorên wê li ser qelsbûna rola aktîv a jinan di civakê de nîqaş kir.

Beşdaran diyar kir ku pêwîst e têkoşîn were bilindkirin, jinên cîhanê bibin yek ku tundiya li ser jinan sînordar bikin, hişyariya çandî were zêdekirin û dewreyên perwerdê ji jinan re werin lidarxistin.

Dûre daxuyanî hat dayîn û tê de biryara darvekirinê ya li dijî çalakger Werîşe Mûradî ji hêla desthilatên Îranê ve hat şermezarkirin.

Endama Kongra Star a Dirbêsiyê Silava Simo daxuyanî xwend. Her wiha girtina çalakger Werîşe Mûradî ji hêla Wezareta Îstîxbarata Îranê û îşkenceya wê bi hem û rê û rêbazan û dayîna cezaya darvekirinê li dijî wê hat şermezarkirin.

Di dawiya daxuyaniyê de hat gotin çalakgerên di Kongra Star de dê bibin dengê Werîşe Mûradî.

(fr)

ANHA