Li Dêrazorê hêzên Şamê 2 stasyonên avê şewitandin

Di encama êrişa hêzên hikumeta Şamê û çeteyên wê yên bi navê ˊDîfa El Wetenîˊ li rojhilatê Dêrazorê de 2 stasyonên avê bi temamî hatin şewitandin û ji xizmetê derketin.

7 tebax 2024 20:37

NAVENDA NÛÇEYAN

Di saetên sibehê de hêzên hikumeta Şamê û ˊDîfa El Wetenîˊ êrişî gundên rojhilatê Dêrazorê, Sûsê, Şefa El Sûr, Xeranîc, Keşkiyê, Ebû El Hemam, Ebû Herdûb, Cerzî El Şerqî, Cerzî El Xerbî, Teyane, Buseyra, Sebha û Zîban kirin. Di êrişê de 2 kes şehîd bûn, 7 kes birîndar bûn û 2 istasyonên avê hatin şewtandin.

Stasyona avê ya zeviya Omer ku dikeve rojhilatê taxa El Letwa ya gundê Zîban, avê dide 3 hezar malbat ên taxê. Hêzên hikumeta Şamê û Dîfa El Wetenî piştî ku êrişî gundê Zîban kir ew stasyona avê şewitandin.

Her wiha li gundê Ebû El Hemam 3 stasyonên avê hene. Stasyona yekem a gundê Ebû El Hemam ji aliyê hêzên hikumeta Şamê û Dîfa El Wetenî ve hat şewtandin. Wê stasyonê ava vexwarinê dida 4 hezar malbatan.

Transformer û dînemoyên her du stasyonên avê hatin şewtandin û ji xizmetê derketin.

ANHA