Li Cizîrê û Helebê çalakiyên hunerî, jîngehî û çandî

Bi nêzbûna Roja Jinan a Cîhanê Komîteya Perwerdê û Fêrkirinê ya Civaka Demokratîk (KPC-D) li Baxçeya Kulîlkên Pêşerojê ya li taxa Şêxmeqsûd a Helebê pêşangeh vekir.

Endam û rêveberên saziyên sivîl, partiyên siyasî, meclis û komînan beşdar bûn û ji hêla endama KPC-D’ê Rojbîn Dada axaftin hat kirin.

Rojbîn amje bi berxwedana ku jin di oxira bidestxistina azadiya xwe de raber dikin, kir û got pêwîstî bi bilindkirina têkoşînê heye, heta ku armancên wan bigihînin serî.

Dûre 60 tabloyên berxwedana şervanan li Bendava Tişrînê nîşan dide û kesayetên efsanewî mîna Şahmîran hatin pêşkêşkirin. Li kêlek wê jî 28 peykerên ku piranî wan folklora efrînî nîşan didin, hatin pêşkêşkirin.

TIL HEMÎS

Girêdayî heman mijarê, endamên Kongra STar a Til Hemîsê, endamên saziyên sivîl, partiyên siyasî 25 darên hawîrdorê li goristana şehîdan çandin û gul li endamên jin ên Hêzên Ewlekariya Hundirîn belav kirin.

Jinan rola ku Rêber Abdullah Ocalan di rizgarkirina jinan ji zihniyeta baviksalariyê de lîstiye û xurtkirina wê di tevahî aliyên jiyanê de silav û pîroz kir.

Çalakî bi teqezkirina beşdaran li ser girîngiya parastina jingehê bi dawî bû.

DÊRIK

Her wiha Nivîsgeha Jinan a Şaredariya Gel a Dêrikê navê Şehîd Hevrîn Xelef li rêya sereke ya ber bi Nexweşxaneya Wetenî ya li Dêrikê ve, kir.

Di çalakiya navlêkirinê de gelek endamên şaredariya Dêrikê, nûnerên Kongra Star û Meclisa Malbatên Şehîdan beşdar bûn.

Di heman çarçoveyê de Partiya Yekitiya Demokratîk (PYD) li Dêrikê ji xelkê bajêr re civînek ji bo nîqaşkirina nirxandinên Rêber Abdullah Ocalan ên li ser 8’ê Adarê, li dar xist.

Di civînê de endama PYD’ê Hediye Mihemed nirxandina Rêber Abdullah Ocalan xwendin û teqezî bi têkoşîna bênavber a ji bo pêkanîna mafên jinan û xurtkirina wê di civakê de kir.

Hediye di dawiyê de got bangên Rêber Abdullah Ocalan ên ji bo aştî û ewlehiyê nûnertiya rêya pêkanîna îstîqrara li Rojhilata Navîn dikin.

Civîn bi diruşma "Bijî berxwedana Rêber Apo" bi dawî bû.

ÇILAXA

Bi diruşma "Bi Jin, Jiyan, Azadî ber bi Sûriya demokratîk ve" Koordînasyona Jinan ya Rêveberiya Dibistanan a Çilaxa ya kantona Cizîrê bi wesîleya 8’ê Adarê rêzeçalakî li dar xistin.

Her wiha di çarçoveya vê boneyê de daxuyaniyek hat xwendin.

Di daxuyaniyê de girîngî bi Roja Jinan a Cîhanê hat dayîn û hat gotin ku ew ne tenê boneyek e, lê belê nûkirina soza dewamkirina têkoşînê li dijî tevahî şêweyên zulm û zordariyê ye.

Di heman çarçoveyê de Koordînasyona Jinan li yarîgeha Komeleya Helîq a Werzîşê maçek di navbera tîma "Amadehiya Alet El Qews a Benat" û "Amadehiya Şehîd Zagros a Çilaxa" de organîze kir.

Dûre rêveber Nizhet Seyfudîn axivî û got divê keç li ser şopandina hêviyên xwe di tevahî aliyan de werin teşwîqkirin.

Tîma Alet El Qews bi -1-0 li hember tîma Şehîd Zargos bi ser ket û ji hêla Koordînasyona Jinan û Rêveberiya Dibistanên Çilaxa ve hatin xelatkirin.

AMÛDÊ

Kongra Star bi hevkariya rêxistinên jinan re, li navenda PYD’ê ya Amûdê şahiyek li dar xist. Di şahiyê de jinên bajêr, endamên Kongra Star û endamên Navendên Civaka Sivîl bi cil û bergên xwe yên gelêrî beşdar bûn.

Di şahiyê de nûnera Rêxistinên Jinan Şêrîn Ferho axivî û ev bone li tevahî jinên têkoşer pîroz kir û got: "Jin bi saya felsefeya Rêber Abdullah Ocalan gihîşt vê qonaxê."

Dûre koma Şehîd Yusra Derwêş şanoyeke ku balê dikişîne ser girîngiya rola jinan di jiyanê de pêşkêş kir.

Çalakî bi gerandina dîlanê bi dawî bû.

Li aliyekî din jî Komîteya Çalakiyan a Rêveberiya Dibistanan li bajarê Amûdê lîga voleybolê ya keçan, bi beşdariya bi dehan xwendekar û mamoste, û nûnerên Rêveberiya Dibistanan organîze kir.

Di lîgê de xwendekarên ji dibistanên Tîrêj û Bedî Xilo yên navîn û xwendekarên ji dibistanên Viyan Amara û Meryem Xan ên amadehî beşdar bûn.

Di tûra yekem de tîma dibistana navîn a Tîrêj bi ser ket û di tûra duyemîn de tîma dibistana amadehî ya Meryem Xan bi ser ket.

Di maça dawî de tîma dibistana Meryem Xan li hember tîma dibistana Tîrêj bi ser ket.

Di gera yekê de tîma dibistana Tîrêj a navîn li hemberî tîma dibistana Meryem Xan a amadehî

Dûre nûnera Rêveberiya Dibistanên Amûdê Hena Xalid axivî û got: "Me ev çalakî li dar xist, ji bo ku em bêjin jinan di tevahî aliyan de xwe îsbat kiriye."

Di dawiya çalakiyê de tîmên beşdar bi spasname û medeliyên zêrîn û tîma tacîdar bi kasê, hatin xelatkirin.

(fr)

ANHA

HELEB