Li Brukselê çalakiya dijî cezayên dervekirinê yên li Îranê

Komîteyên PJAK û KJAR’ê bi armanca şermezarkirina cezayên darvekirinê yên li hember aktivîstên jin ên Kurd li paytexta Belçîka Brukselê çalakiyek lidar xistin.

Çalakiya şermezarkirinê ya li ber stasyona Trenê ya Navendî bi pêşengiya KJAR û PJAK'ê pêk hat.

Di çalakiyê de pankartên weke "Na ji darvekirinê re, erê ji jiyanê re", "Jin jiyan azadî", "dawî li rejîma mollayên dîktator a li Îranê bînin", "Dest ji kuştina aktîvîstên Kurd berdin" û "Êşkenceyê bisekinînin" bi zimanên Îngilîzî, Fransî, Flamanî, Kurdî û Farsî hatin vekirin.

Di çalakiyê de wêneyên aktîvîstên Kurd Werîşe Mûradî, Pexşan Ezîzî, Şerîfe Muhammed û Zeynep Celaliyan hatin rakirin.

Di daxuyaniya çapemeniyê ya li ser navê PJAK û KJAR'ê de cezayên darvekirinê yên li Îranê bi tundî hatin şermezarkirin. Di daxuyaniyê de hate diyarkirin ku ev biryar mînaka zextên sistematîk ên li ser kesên azadîxwaz û mûxalîfên li welat tên meşandin e.

Her wiha hat destnîşankirin, ku desthilatdariya otorîter dixwaze bi avakirina hewirdorek a tirsê, desthilatdariya xwe bidomîne.

Her wiha bang li civaka navneteweyî hat kirin ku li dijî zilm û binpêkirinên li Îranê helwestek xurt nîşan bidin.

PJAK û KJAR'ê, li dijî cezayên darvekirinê banga çalakiyan kirin û destnîşan kirin ku têkoşîna azadî, edalet û mafên mirovan ti carî nikare bê bêdengkirin.