Li Bakur û Rojhilatê Sûriyeyê şehîd Şîlan Kobanê û hevrêyên wê hatin bibîranîn

29′ê Mijdarê salvegera şehadeta endama Komîteya Navendî ya PYD′ê û 4 hevrêyên wê (Şîlan Kobanê, Zekeriya, Fûad, Ciwan û Cemîl) e ku li ser sînorê Sûriyeyê-Iraqê di 2004′an de hatin sûiqastkirin.

Di van deman de her sal li Bakur û Rojhilatê Sûriyeyê çalakî û civînên bîranînê ji bo şehîd Şîlan û hevrêyên wê tên lidarxistin. Her wiha di rêzeçalakiyan ku îro li kantona Efrîn, Şehba, navçeyên kantonên Hesekê (Dirbêsiyê, Hol, Til Birak, Şedadê) û Qamişloyê (Til Hemîs, Tirbespiyê, Çilaxa) û Reqayê hatin lidarxistin de salvegera 19′an a şehadeta wan hatin bibîranîn.

ŞEHBA

Li Şehbayê civîn li Kampa Serdem, Berxwedan, Fafîn û Til Rifetê bi beşdariya koçberên Efrîn û xelkê Şehbayê hatin lidarxistin.

Di civînan de endamên PYD′ê Welîd Dîngilî, Luqman Jaro, Sureye Mistefa û Yildiz Mihemed ‎axivîn.

Axêveran şehîd Şîlan û hevrêyên wê bi bîr anîn û hate got: "Di hemû şoreşan de têkoşerên ‎pêşeng hene ku şoreşê ber bi serkeftinê ve dibin. Gelek têkoşer û fermandar ji bo serxistina ‎şoreşê canê xwe dan. Şehîd Şîlan û hevrêyên wê jî ji wan in. Ew di encama komployeke de ku ‎îstîxbarata partiya Baas a Sûriyeyê û hikumeta Tirk plan kiribû, hatin şehîdxistin.”‎

KANTONA HESEKÊ

Meclisa Malbatên Şehîdan a Dirbêsiyê ya Hesekê, bi daxuyaniyekê şehîd Şîlan û hevrêyên wê bi beşdariya xelkê navçe, endamên sazî û meclisên navçeyê bi bîr anîn. Endama Meclisa Malbatên Şehîdan Foza Yûsif daxuyanî xwend.

Di daxuyaniyê de şehîd Şîlan û hevrêyên wê hatin bibîranîn û hate gotin şehîd Şîlan fermandarê PYD′ê bû ji lew re hate hedefgirtin û bi şehîdxistina wê xiyanet hate aşkerakirin.

Her wiha PYD′ê li navçeya Holê şehîd Şîlan û hevrêyên wê bi civînekê li hola partiyê û bi beşdariya xelkê navçe, endamên saziyên sivîl û partiyên siyasî bi bîr anîn.

Di civnê de hevseroka Meclisa Navçeya Holê Wefa Îbrahîm axivî û bi awayekî kurt bal kişand ser rêwîtiya têkoşîna şehîd Şîlan û anî ziman ku ji destpêka damezrandina PYD′ê ve şehîd Şîlan hewl da fikra demokratîk di nava tevahîî gelan de belav bike û li ser fikir û felsefeya Rêber Abdullah Ocalan tê koşiya.

Li navçeya Til Birakê jî civînek hate lidarxistin. Di civînê de endama rêveera PYD′ê Seher El Mehmûd axivî û bang li tevahî gelan kir ku hevgirtî bin û li dijî planên dijmin bisekinin û wiha got: "Hedefgirtina hevrêyên me û damezrînerên PYD′ê heta niha dewam dike û ev kiryar bi ser nakevin, ji ber ku gelê me berxwedêr e."

Li aliyekî din jî endamê PYD′ê Ebdurehîm Fatimî axivî û got ew ê li ser şopa şehîd Şîlan û hevrêyên wê bimeşin û hewldanên çewisandina şaristanî û çandana têk bibin.

Li Şedadê ya Hesekê jî, PYD′ê civînek girse li dar xist. Di civînê de endamê rêvegera PYD′ê Fadil Ehmed li ser têkoşîna şehîd Şîlan axivî û got şehîd Şîlan ji damezrînerên partiyê bû ku hîna ji bo gelan ku neteweya demokratîk û jiyana hevbeş pêk bînin meşale ye.

KANTONA QAMIŞLO

Bi dehan xelkê navçeya Til Hemîs, nûnerên saziyên civaka sivîl, partiyên siyasî û şêxên eşîran li hola Navenda Çandê ya li rojhilatê navçeyê kom bûn û beşdarî merasîma bîranîna Şîlan Kobanê û hevrêyên wê bûn.

Di merasîmê de hevseroka PYD′ê ya Til Hemîsê Bedîe Ebdurehman tevahî şehîdên tevgera rizgariya Kurdistanê di şexsê şehîd Şîlan û 4 hevrêyên wê de bi bîr anîn.

Bedîe li ser têkoşîna şehîd Şîlan û hevrêyên wê axivî û wiha domand: "Ew şehîd damezrînerên PYD′ê bûn û nûnertiya fikir û felsefeya Rêber Abdullah Ocalan kirin."

Li aliyekî din jî endama rêvebera Kongra Star a Til Hemîsê Sena Rehîle têkoşîna şehîd Şîlan silav kir û got: "Beşdarbûna me ya îro li vê bîranînê baweriya me ya kûr a şopandina rêça şehîdan û banga bilindkirina têkoşînê nîşan dide."

Li Tirbespiyê jî xelkê navçe û nûnerên partiyên siyasî, saziyên sivîl, meclis û Kongra Star şehîd Şîlan û hevrêyên wê li avahiya PYD′ê ya li rojavayê navçeyê bi bîr anîn.

Di merasîma bîranînê de hevseroka PYD′ê ya navçeyê Hediye Şemo li ser siûqastkirina şehîd Şîlan û hevrêyên wê axivî û got: "Ew yek komploya li dijî armancên gelê herêmê yên ber bi azadiyê ve bû."

Hediye diyar kir ku PYD′ê li ser mîrasa şehîdan hate damezrandin û hîna di oxira pêkanîna armancên wan de têkoşîna xwe didomîne.

Li aliyekî din jî endamê PYD′ê Hecî Îsmaîl axivî û got PYD′ê modela biratiya gelan, jiyana hevbeş û hevgirtinê ye.

Her wiha xelkê navçeya Çilaxa Axa li navenda çandê ya navçeyê şehîd Şîlan û hevrêyên wê bi bîr anîn.

 Di merasîma bîranînê de endama rêvebera Kongra Star a Çilaxa Semer Hisên ji beşdaran re jînname û têkoşîna şehîd Şîlan xwend.

Li aliyekî din jî endamê PYD′ê şaxê Çilaxa Hisên Fayiq axivî û got: "Şehîd ew in ku keştiye me ber bi bejahiyê ve birin da ku zemîneke guncaw ji rêxistinkirina partiyê re ava bikin. Li pey xwe mîraseke mezin hiştin ku em li ser bimeşin û da ku em layiqî vê mîrasê bin, divê em têkoşîna li dijî planên dijmin û xayînan bilind bikin."

REQA

Di vê çarçoveyê de Meclica Malbatên Şehîdan û Nivîsgeha PYD′ê ya Reqayê ji bo bîranîna şehîd Şîlan û şehîdên meha Mijdarê merasîm li dar xist. Di merasîmê de endamên saziyên sivîl û leşkerî, hevseroka Meclisa Sivîl a Reqayê Hêvîn Îsmaîl, endamên Nivîsgeha PYD′ê, Partiya Sûriya Pêşerojê û malbatên şehîdan beşdar bûn.

Di merasîmê de endama Melcisa Giştî ya PYD′ê Newroz Muslim axivî û got: "Şehîd Şîlanê perwerdeya zimanê Kurdî dida zarokan û heval Cemal têkildarî girêdana wê ya xurt bi fikir û çanda partiyê ve pesna wê pir da."

Her wiha endama rêvebera Komîteya Perwerdê ya Meclisa Kombûna Jinan a Zenûbiya ya Reqayê Kînana Ebdo jî axivî û got: "Em Meclisa Kombûna Jinan a Zenûbiya li ser şopa şehîdên xwe dimeşin da ku azadiyê ji tevahî jinên bindest re pêk bînin. Em di wê yekê de xwe dispêrin fikir û îdeolojiya Rêber Abdullah Ocalan."

Dûre dayika 2 şehîdan; Mehmûd û Ebdurehman Xidir, Necah Mihemed jî axivî û wiha got: "Şehîdan dîrokeke ji nifşên bê re bi tîpên zêrîn nivîsand. Ew meşaleyên nayên vemirandin."

Di dawiya merasîmê de li pêş wêneyên şehîdan mûm hatin pêxistin.

HERÊMA FIRATÊ

Koçberên li kampa Girê Spî ya kantona Kobanê, di civînekê de ku li qada kampê hatiye lidarxistin şehîd Şîlan û hevalên wê bi bîr anîn û gotin heya serkeftin pêk were û dagirkerî ji herêmên wan derkevin, dê li ser şopa şehîdan bin.

Di civînê de hevserokê PYD`ê şaxê kantona Girê Spî Sabrî Nebo axivî û şehîdên partiyê yên ku sala 2004`an bi destê xayînan û pergalên faşîst hatin şehîdxistin, di kesayeta şehîd Şîlan Kobanê de bibîr anîn. Her wiha balkişand ser têkoşîna şehîd Şîlan û çi ji gel, herêmê û jinan re pêşkêş kiriye û her wiha rola wê ya sereke di avakirina PYD`ê de.

MINBIC

Li Minbicê jî, PYD`ê şehîd Şîlan û hevalên wê bi merasîmekê li hola meclisa qanûn bibîr anîn.

Endamên Rêveberiya Sivîl a Demokratîk a Minbicê, meclisên sivîl, partî, Meclisa Malbatên Şehîdan û Meclisa Kombûna Jinan a Zenûbya tev li merasîmê bûn.

Berdevka Komîteya Perwerdeyê ya Kombûna Jinan a Zenûbya Asya Mihemed û hevserokê PYD`ê şaxê Minbicê Mehmûd Cemo axivîn û dsetnîşan kirin ku şehîd Şîlan û her 4 hevalên pê re di kemînekê de ji aliyê PDK`ê ve û bi hevkariya dewleta Tirk a dagirker ve hatin şehîdxistin.

KOBANÊ

Li Kobanê jî, bi dehan şênî, endamên saziyên Rêveberiya Xweser, civaka sivîl, PYD`ê şehîd Şîlan Kobanê û hevalên wê bi merasîmekê bi bîr anîn ku PYD`ê li hola Firat a bajêr li dar xist.

Di merasîmê de endama rêveberiya PYD`ê şaxê Kobanê Nesra Derwîş, endamê Desteya Rêveber a PYD`yê Ehmed Xoce axivîn û gotin PYD`ê mîrasa têkoşîna Tevgera Rizgariya Kuristanê û berxwedana ji çiyayên Kurdistanê dest pê kiriye û li her çar parçeyên wê belav bûye.

Bi navê malbata şehîd Şîlan, birayê wê Cûdî Îbrahîm axivî û got: “Şehîd Şîlan xwedî kesayeteke wêrek bû, li dijî zihniyeta baviksalarî û desthilata rejîma Sûriyeyê sekinî, ji bo ku kurd mafên xwe bi dest bixin û nasnameya xwe vegerîne, tê koşiya.”

TIL TEMIR

Ji bo bîranîna şehîd Şîlan û her 4 şehîdên pê re ku di kemîna PDK`ê de sala 2004`an şehîd bûne, li hola Meclisa Malbatên Şehîdan a Til Temirê merasîmek hate lidarxistin.

Bi dehan endamên saziyên sivîl, nûnerên partiyan ên navçeyê tev lê bûn.

Di merasîmê de hevserokê PYD`ê şaxê navçeyê Ridwan Xelef axivî û got: “Şehîd Şîlan xwe bi fikr û felsefeya Rêber Abdullah Ocalan bi çek kir, li ser şopa wî tê koşiya ji bo ku azadiyê ji jinan re bi dest bixe û wê ji zihniyeta baviksalarî û desthildar xilas bike.”

Di heman çarçoveyê de meclisên malbatên şehîdan ên navçeyên Şedad û Til Temirê bi daxuyaniyên cuda şehîd Şîlan û hevalên wê bi bîr anîn û soz da ku şopdarên rêya şehîdan bin.

HELEB

PYD`ê şaxê Helebê ji bo bîranîna şehîd Şîlan Kobanê û hevalên wê, civînek li dar xist. Tevî şêniyên her du taxên Şêxmeqsûd û Eşrefiye, endamên saziyên sivîl, nûnerên partiyan tev lê bûn.

Di civînê de endama PYD`ê Klara Adasam axivî û got: “Ji bo pêkanîna hêviyên hevalan di avakirina welatekî demokratîk û azad de û pêkanîna azadiya fîzîkî ya Rêber Abdullah Ocalan, em soz didin ku têkoşînê mezin bikin.

Dûre sinefizyonek li ser jiyana şehîd Şîlan û têkoşîna wê hate pêşandan.

(fr-şx)

ANHA