Li 4 bajaran meş: Divê hesab ji dewleta Tirk a dagirker bê pirsîn

Îro salvegera 7’emîn a dagirkirina Efrînê ji aliyê dewleta Tirk a dagirker û çeteyên wê ve ye. Bi vê boneyê li 4 bajaran meşên girseyî hatin lidarxistin.

REQA

Li bajarê Tebqayê ji aliyê Kombenda Efrînê ya Civakî ve meşek bi beşdariya şêniyên Reqa û koçberên ji kantona Efrîn-Şehbayê hat lidarxistin. Meş ji pêşiya Nexweşxaneya Şehîd Kendal dest pê kir û li Qada Jina Azad veguherî mîtîngê. Li vir deqeyeke rêz hat girtin, piştre hevserokê Kombenda Civakî ya Efrînê Mihemed Reşîd daxuyaniyek xwend.

Di daxuyaniyê de sûcên dewleta Tirk a dagirker û çeteyên wê yên li dijî xelkê Efrînê û bêdengiya hêzên navneteweyî ya li hemberî van sûcan hat vegotin.

Di dewama daxuyaniyê de îşaret bi israra şêniyên Efrînê li warê xwe hat kirin û hişmendiya desthilata Şamê hat şermezarkirin. Hate diyarkirin ku desthilata Şamê pêkhateyên gelê Sûriyeyê paşguh dike û hewl dide pergaleke din a otorîter ava bike.

TEBQA

Bi heman armancê şêniyên Tebqayê û koçberên ji kantona Efrîn-Şehbayê ji kampa demkî ya koçberan a li cihî werzîşê ber bi avahiya Meclisa Malbatên Şehîdan ve meşek li dar xist. Di meşê de pankartên “Efrîna berxwedêr, bi teqez em ê vegerin", "Welat tenê ax nin e, lê giyanek di dil de ye", "Efrîn di dilê me de ye" û "Dagirker wê têk biçin" hatin vekirin. Bê navber jî dirûşmên "Gelê Sûriyeyê yek e" û "Bi can, bi xwîn em bi te re Efrîn" hatin olandin.

Li ber avahiya Meclisa Malbatên Şehîdan rêvebera Meclisa Koçberên kantona Efrîn-Şehbayê Bozan Xelîl axivî. Bozan Xelîl anî ziman ku vegera ewle ya şêniyên Efrîn-Şehbayê li warê mafekî rewa ye ku jê nayê xwarin. Her wiha bang li civata navneteweyî kir ku dewleta Tirk û çeteyên wê ji herêmên dagirkirî derxin û garantiya ewle ya vegera koçberan bide.

Hevserokê Meclisa Malbatên Şehîdan a Kantona Tebqayê Mehmûd El Sayîl jî axivî û got: "Îro salvegera bi êş a dagirkirina Efrînê ye bajarê ku gelê wê hat koçberkirin û sûcên herî mezin li dijî wê hatin kirin."

El Sayîl anî ziman ku sûcên dewleta Tirk a dagirker ên li dijî Efrînê beşek ji şer û siyasetên wê yên despotîk ên li dijî gelê herêmê ye.

KOBANÊ

Bi sedan şêniyên kantona Firatê ji bo salvegera 7’an a dagirkirina Efrînê ji aliyê dewleta Tirk û çeteyên wê ve, daketin qadan û meşîn.

Gel li Qada Jina Azad a Kobanê li hev kom bû û li wir dest bi meşê kir. Meşê heta Qada Şehîd Egîd dewam kir.

Li wir cîgira hevserokên Meclisa Rêberiya Xweser a Kantona Firatê Mizgîn Xelîl dagirkirina Efrînê şermezar kir.

Mizgîn Xelîl diyar kir ku dewleta Tirk û çeteyên wê bi hemû awayî hovîtiya xwe, erdnîgariya Efrînê guhert û ev li axaftina xwe zêde kir: “Em 7`emîn salvegera dagirkirina Efrînê şermezar kirin. Efrîn beriya 2018`an weke paytexta Kurdistanê, nimûneya jiyana demokratîk ku tê de tevahî neteweyên Kurd, Ereb û êzidî bi hev re bi awayekî azad û wekhev dijîn. Bi çand û baweriyên xwe, ew gel bi hev re dijiyan. Her wiha dema ku gel gelên ku koçber dibûn ku cihekî ewle digeriyan, berê xwe didin Efrînê.”

Mizgînê da zanîn ku ji aliyên hêzên hegemonîk ve ku li gorî berjewandiyên xwe, Efrînê kirin qurbaniya berjewandiyên xwe û wiha got: “Ji bo Koalîsyona Navneteweyî dibêjin, divê demildest, destwerdan ji bo rewşa gelê Efrînê were çêkirin û dawî li guhertina demografîk were. Dibê di zûtirîn dem her kesên koçber vegerin cihê xwe û li cihê xwe bijîn.”

Ji şêniyên Efrînê yê ku niha li Kobanê bi cih bûye Loqman Caro jî anî ziman ku êş û astengiyên ku gel dîtin pir zehmet bûn û got: “Ew kêliyên biêş her tim tên bîra me. Roj bi roj û sal bi sal em Efrîna xwe bi bîr tînin. Dema ku gelê Efrînê ji Efrînê derket tenê sê tişt bi xwe re anîn, Keramet, hêvî û baweriya xwe bi xwe re anîn. Em tu carî hêviyên xwe naşikînin. Baweriya me heye ku em careke din vegerin Efrîna xwe ya rengîn. Em dibêjin divê em êrişên dagirkeriyê êdî rawestin û koçber vegerin bajarê xwe.”

Meş bi dirûşma “Berxwedana jiyan e” û “Şehîd namirin” bi dawî bû.

HELEB

Însiyatîfa Gel a Helebê bi vê boneyê meşek li dar xist. Bi hezaran şêniyên taxên Şêxmeqsûd û Eşrefiyê û endamên rêxistinên civaka sivîl û partiyên siyasî beşdarî meşê bûn.

Beşdaran wêneyên Rêber Abdullah Ocalan, şehîdên Berxwedana Serdemê û şaxên zeytûnan bilind kirin û li kolanên sereke yên taxê geriyan. Di meşê de dirûşmên “Bijî Berxwedana Efrînê” û “Şehîd namirin” hatin berzkirin.

Girseya gel li Çerxerêya Zeytûnê ya taxa Eşrefiyê veguherî mîtîngê. Rêveberê Meclisa Tenduristiyê Osman Şêx Îsa li ser navê Meclisa Giştî ya taxên Şêxmeqsûd û Eşrefiyê axaftinek hemû şehîdên bexwedana Efrînê bi bîr anîn.

Şêx Îsa bal kişand ser helwesta desthilatdarên Sûriyeyê li ser mijara Efrînê û xemsariya wan der barê vegera bi ewle ya koçberên Efrînê û got: "Heta ku dagirker û çeteyên wê ji herêma me dernekevin, em ê venegerin. Desthilata Sûriyeyê jî vê tiştê paşguh dike.”

Li ser navê Kongra Star, rêvebera buroya perwerdeyê Sûad Hesen destnîşan kir ku heta ku herêm ji dagirkeriya Tirkiyeyê û çeteyên wê were rizgarkirin dê têkoşîna wan dewam bike.

Sûad sedemên êriş û dagirkeriya li ser Efrînê nirxand û got: "Gel ji bo xwe bi rêxistin bike sîstema Rêveberiya Xweser pejirand û ji bo jiyana hevpar a aştiyane pêk were, prensîba biratiya gelan pejirand. Ev yek li kêfa dewleta Tirk a dagirker nehat û ev jî bû sedem ku êriş bike.”

(ekîb)

ANHA