Li 3 navendan pîrozbahiyê Roja Zimanê Kurdî

Bi boneya Roja Zimanê Kurdî (15'ê Gulanê) şahî li bajarê Şêranê û gundê Girik yên kantona Firatê hatin lidarxistin. Di her du şahiyan de pêşangehên destkarî û wêneyan hatin vekirin.

Di şahiya li bajarokê Şêranê de endamên sazî û dezgehên Rêveberiya Xweser, Kongra Star, mamoste, xwedenkar û malbatên şagirtan bi cil û bergên xwe yên Kurdî amade bûn.

Şahî bi deqeyeke rêzgirtin dest pê kir. Piştre hevseroka Yekitiya Mamosteyan a Kantona Firatê Narîn Xelîl Muslim axivî. Narîn di destpêka axaftina xwe de Roja Zimanê Kurdî li malbatên şehîdan, mamoste û xwendekaran pîroz kir û got, dê ji bo zimanê dayikê têkoşîn bikin û asta zimanê xwe xurtir bikin.

Di şahiyê de helbest û stran hatin gotin û şanoyek li ser zimanê Kurdî hat pêşkêşkirin.

Bi heman boneyê li gundê Girik ê bajarê Sirînê jî şahiyek ji aliyê navenda Çand û Hunerê ya gund ve hat lidarxistin.

Şahî li dibistana Şehîd Dijwan Girik bi amadebûna endamên sazî û dezgehên Rêveberiya Xweser, Kongra Star, mamoste, xwedenkar û malbatên şagirtan pêk hat.

Di şahiyê de rêveberê dibistanên Sirînê Hisên Muslim axivî û got:"Di nava pencên qirkirinê de alfebeya kurdî xwe nûjen kir, ruxmî ku mêtîngerên Kurdistanê xwestin zimanê me tune bikin, lê ziman xwe nûjen kir û dewlemend bû."

Piştî axaftinê stran, helbest, şano û dîlan hatin pêşkêşkirin.

QAMIŞLO

Peymangeha Amadekarkirina Mamosteyan a bajarê Qamişloyê jî bi boneya 15’ê Gulanê şahiyek bi dirûşma "Fêrbûna bi zimanê dayikê mafekî bingehîn û xwezayî ye" lidar xist.

Şahî li Navenda Çand û Hunerê ya Mihemed Şêxo hat lidarxistin. Bi dehan xwenekar, mamoste, rewşenbîr, endamên saziyên sivîl û şêniyên bajar bi cilên xwe yên netweyî beşdarî pîrozbahiyê bûn.

Piştî deqeya rêzgirtin, rêvebera Peymangeha Amadekirina Mamosteyan Eyn El Heyat Ebas Roja Zimanê Kurdî li gelê Kurd pîroz  û şehîdên ku di rêya parastina zimanê Kurdî de canê xwe feda kirine, bi bîr anîn.

Di şahiyê komên Orkêş, Efrîn, Kurdistan û Şehîd Şîlan hunerên xwe pêşkêş kirin. Li ber stranan govend hatin gerandin.

(sş/bb)

ANHA