Koçberên Serêkaniyê êrişên dagirkeriyê şermezar kirin

Îro bi sedan koçberên ji bajarê Serêkaniyê li kampa Serêkaniyê ya bajarê Hesekê, ji bo şermezarkirina êrişên dagirkeriyê yên dewleta Tirk û çeteyên wê yên li ser Bakur û Rojhilatê Sûriyeyê û koçberkirina xelkê ji warên wan, li pêşiya navedna meclisa kampê xwepêşandanek li dar xistin.

Başdaran pankartên bi nivîsên “Şêniyên kampa Serêkaniyê dagirkeriya dewleta Tirk şermezar dikin û banga alîkariyê ji bo koçberên Efrînê dikin” û “Em êrîşên dewleta Tirk ên li ser gelê me yên Şehba û Til Rifetê şermezar dikin“ , hildan û durişmên şermezarkirina dagirkeriya Tirk berz kirin.

Beşdarên xwepêşandanê li ber deriyê sereke yê kampê kom bûn.  Piştî deqeyek rêzgirtinê endamê Meclisa Malbatên Şehîdan a Serêkaniyê Ebdulrezaq Ehmed axivî û got: “Em hilweşandina rejîma Beşar Esed li hemû gelê Sûriyeyê pîroz dikin û em hêvîdar in ku hemû koçber vegerin cih û bajarên xwe.”

Ehmed bi tundî êrişên dewleta Tirk a dagirker li ser herêmên Bakur û Rojhilatê Sûriyeyê şermezar kir û diyar kir ku dewleta Tirk a dagirker û çeteyên wê di çarçoveya hewldanên xwe yên ji bo guhertina demografiya herêmê de gelê resen ji kantona Efrîn û Şehbayê koçber kirine.

Di berdewamiya axaftina xwe de Ehmed tekez kir ku divê Sûriye bibe welatê hemû gelên Sûriyeyê.

Xwepêşandan bi dirûşmeyên "şehîd namirin" û bangên ji bo yekîtiyê, bi dawî bû.

(k)