Koçberên Efrînê yên li Helebê daxwaza bidawîkirina dagirkeriyê kir

Meclisa Giştî ya Taxên Şêxmeqsûd û Eşrefiyê, ji bo şermezarkirina binpêkirinên çeteyên dewleta Tirk a dagirker li Efrîna dagirkirî meşek li dar xist. Şênî û koçberan di meşê de banga misogerkirina vegera ewle û vekişîna dagirkeriya Tirk û çeteyên wê ji herêmê kir.

Di meşê de bi sedan koçberên Efrînê û şêniyên herdu taxan, nûnerên partiyên siyasî, saziyên sivîl, meclis, komîn û Hêzên Ewlekariya Hundirîn beşdar bûn.

Di meşê de pankartên "Daxwaza me vegera ewle û rûmet li Efrînê û derxistina dagirkerî û komên wê", "Bimire îxanet" û "Berxwedan jiyan e" hatin bilindkirin.

Meş ji pêşiya hola 8'ê Adarê ya rojavayê taxa Şêxmeqsûd dest pê kir, li nav kolanên sereke yên taxê geriya û ber bi qada li nêzî Navenda Çand û Hunerê ya Cemîl Horo ya taxa Eşrefiyê ve bi rê ket.

Li wir meş veguherî mîtîngî, hevserokê Meclisa Giştî ya taxên Şêxmeqsûd û Eşrefiyê Nûrî Şêxo axivî û got divê alî pabendî peymana 10’ê Adarê îmze kirine, bin, li gorî civîn û nîqaşên bi bend û biryaran bi dawî bûne tev bigerin.

Şêxo bang li hikumeta veguhêz a Sûriyeyê de li hember binpêkirinên li dijî xelkê Efrînê bi destê çeteyên dewleta Tirk a dagirker dibin, ji bêdengiya xwe derkeve.

Dûre endama Şaredariya Gel a Taxên Şêxmeqsûd û Eşrefiyê Şehînaz Horo bang kir ku vegerek ewle û rûmet ji bo koçberên Efrînê misoger bikin, dagirkerî û tevahî komên wê ji herêmê derxin, divê mal û milkên welatiyan bêyî tu astengiyan li xwediyên wan werin vegerandin, girtiyên li gel dewleta Tirk a dagirker û çeteyên wê bêyî tu şert û mercan werin berdan.

(mh/fr)

ANHA