Ji nûve bicîhbûna hêzên ewlekariyê ber bi dawiyê ve diçe

Li gorî peymana ku di navbera QSD û hikûmeta demkî ya Suriyeyê de hatiye îmzekirin, ji nûve bicîhbûna hêzên leşkerî û hêzên ewlekariya hundirîn ber bi dawiyê ve diçe.

ROJANE

17 sibat, 2026 07:30

NAVENDA NÛÇEYAN

Peymana di navbera QSD û hikûmeta demkî ya Suriyeyê de, 29’ê Çileyê (2026) de hatibû îmzekirin, 30’ê Çileyê hatibû eşkerekirin û 2’yê Sibatê jî dest bi pêkanîna wê hatibû kirin. Di çarçoveya pêkanîna peymanê de 2’yê Sibatê şandeyên Şam û Rojava li Cizîrê û Kobanê civîn û hevdîtin çêkirin, plansazî derxistin.

Li gorî plansaziyan desti pêkanîna xalên peymanê hate kirin. Xala sereke ku li ser tê rawestîn hêzên leşkerî û ewlekariyê ne.

Ji 10’ê Sibatê ve, li herêma Cezîrê û Kobanê cihên ji nûve bicîhkirina hêzên leşkerî û hêzên ewlekariya hundirîn hat kirin.

li gorî peymanê, hêzên QSD’ê wê weke 4 tabûr werin rêxistinkirin, ji vana 3 tabûr li herêma Cizîrê, yek jî li Kobanê be. Li gel ji nûve rêxistinkirina tabûran, hêzên QSD û hikûmeta demkî destpê kirin ku ji nava bajaran derkevin û cihên xwe ji hêzên ewlekariya hundirîn re bihêlin.

Li herêmên Rojavayê Kurdistanê, yanî li Hesekê, Til Temir, Dirbêsiyê, Amûdê, Qamişlo, Tirbesipiyê, Çilaxa, Girkê Legê, Dêrik û Kobanê hêzên QSD’ê li cihên hatine diyarkirin bicîh dibin, li şûna wan hêzên ewlekariya hundirîn (asayiş) bicîh dibin. Heta niha li Hesekê, Qamişlo, Girkê Legê, Tirbespiyê, Çilaxa û herêmên Şêxlêr ên Kobanê ji nûve bicîh pêk hatiye. Li hinek cihên Cizîrê û Kobanê jî bicîhbûn didome.

Hêzên hikûmeta demkî jî heta niha ji beşek herêma Hesekê û Kobanê xwe vekişiyane cihên hatine diyarkirin. Lê hîn pêwîste ji cihên weke Til Koçer, Til Hemîs û Holê jî xwe vekişînin herêma Şedadê. Dîsa li herêma Kobanê jî divê hêzên hikûmeta demkî ji deverên weke Çelebiyê, Sirrin û derdora wê jî xwe vekişînin.

Li gorî agahiyên çavkaniyên leşkerî, li ser ji nûve bicîhbûnê û avakirina tabûran xebat û danûstendin berdewam dikin û çav li rê ye ku di rojên pêş de pêkanîna vê xala peymanê bidawî bibe.

(ANHA)