Ji bo têgihîştina Hevpeymana Civakî çavkaniyek girîng

Kovara Civaka Demokratîk ku ji aliyê Navenda Lêkolîn û Zanistên Civakî ya Akademiya Civaka Demokratîk ve tê amadekerin, bi hejmara xwe ya 21’an gihîşt ber destê xwîneran. 

Kovar ku bi zimanê Erebî û Kurdî tê amadekirin, destpêkê her 3 mehan carekê derdiket, lê 2 hejmarên dawî 6 mehan carekê derketine. Li gorî agahiyên rêveberiya akademiyê wê kovar êdî 6 mehan carekê derkeve.

Di her hejmarek kovarê mijarek taybet wekî dosya tê amadekirin û weşandin. Hejmara 21’an a kovarê jî bi sernavê “Peyman û Civak” hatiye amadekirin.

Mijara dosyaya vê hejmarê, Hevpeymana Civakî û girîngiya wê ya ji bo pêşeroja Suriyeyê, pergala edalet, komîn, meclis, maf, jin, jîngeh û edaletê ye.

Nivîsa yekemîn a kovarê ji nirxandinên Rêber Abdullah Ocalan ên li ser pergala dewletê, Peyman û civakê hatiye amadekirin.

Di nivîsên piştre yên dosyayê de jî li ser hevpeymana civakî û pêşeroja Suriyeyê, prensîbên bingehîn ên hevpeymana civakî, maf û azadiyên bingehîn, sîstema komîn, meclîsan, şaredarî, jin, pergala jîngeh û edaletê hatiye rawestîn.

Ev hejmara kovarê ji bo têgihîştina hevpeymana civakî û sîstema xweseriya demokratîk wekî çavkaniyek girîng dikare were bikaranîn.  

(bm/a)

ANHA