Ji bo standina fidyeyê welatiyan direvînin

Çeteyên dewleta Tirk a dagirker li Efrînê ji bo standina fidyeyê bi dehan kes revandin. Navenda Belgekirina Binpêkirinan der barê van sûcan de raporek weşand.

24 nîsan, 2024 13:22

NAVENDA NÛÇEYAN

Navenda Belgekirina Binpêkirinan têkildarî revandinê welatiyan a li Efrînê û standina fidyeyê raporek weşand.

Di raporê de ev agahî hatin parvekirin:

"2’yê Nîsana 2024’an çeteyên ’Polîsên Leşkerî’ li bajarê Efrînê welatiyê bi navê Ferhad Mihemed li beramberî dayîna 6 hezar dolar wek fidye berda. Hate diyarkirin ku Ferhad Mihemed ê ji gundê Dêr Sewan ê navçeya Şerayê di Îlona 2023’yan de hatibû revandin.

4’ê Nîsanê çeteyên Ceyş El Wetanî welatiyê bi navê Silêman Cuma Mihemed ê ji gundê Behiyê yê navçeya Şêrawa li beramberî dayîna 2 hezar 700 dolarê amerîkî berda. Silêman di dawiya Çileya îsal de li bajarê Efrînê hatibû revandin.

7’ê Nîsana 2024’an çeteyên ‘Polîsên Leşkerî’ li bajarokê Mabatayê welatiyê bitemen ê bi navê Mihemed Hisên ê ji gundê Germok li beramberî dayîna 700 dolar wek fidye û dayîna bi qasî hezar û 500 dolarî wek bertîl ji bo çeteyan, serbest berda.

14’ê Nîsana 2024’an çeteyên Sultan Murad, Ehmed Hayik (41), Mehmûd Omer Dabûl û Ziyad Seyid Ehmed (36) li beramberî dayîna 27 hezar û 500 dolarî berdan. Her sê kes 12’ê Nîsanê ji aliyê çeteyên heman komê ve hatibûn revandin."

(bb)

ANHA