Hêzên Ewlekariya Hundirin: Parastina ewlehiya şêniyan erka me ye

Navenda Ragihandinê ya hêzên Ewlekariya Hundirîn têkildarî êrişên dewleta Tirk a dagirker daxuyaniyek weşand. 

Di daxuyaniyê de hate diyarkirin ku dewleta Tirk a dagirker ji şeva çarşemê de êrişên li dijî herêmê zêde kirin, malên sivîlan li Til Rifetê bombebaran kirin ku di encamê de 2 sivîl biîrndar bûn û 3 kes jî şehîd bûn, ji wan 2 zarok in.

Di daxuyaniyê de hate destnîşankirin ku dewleta Tirk bi balafirên bêmirov gelek navendên stratejîk, xizmetguzariyê, stasyonên petrolê, gazê, kehrebe û firinan ên bajarên kantona Cizîrê û Firatê bombebaran kirin û di encamê de 19 sivîl birîndar bûn û 8 kes jî şehîd bûn.

Her wiha di daxuyaniyê de îşaret pê hate kirin ku dewleta Tirk gelek bendên kontrolê yên Hêzên Ewlekariya Hundirîn li Qamişlo û Kobanê bombebaran kirine û di encamê de endamekî wan li Kobanê şehîd bûye û 2 jî birîndar bûne.

Di daxuyaniyê de hate gotin ku ev êrîş dijminahiya dewleta Tirk li dijî gelê herêmê diyar dibe û weke  "sûcên şer" binav kirin.

Di daxuyaniyê de wiha hate gotin: "Em pabendî erka xwe ne. Şert û merc çi bin, em ê ewlehiya gelê xwe biparêzin. Em bang li gelê xwe dikin ku bi nûçeyên nerast ên li ser malperên medya dijîtal belav dibin, neyên xapandin. Em ê agahî û daneyên rast ên êrişan bi raya giştî re parve bikin."

(şx)