Hêzek Îsraîlê piştî çend saetan ji ketina gundekî Quneytirayê vekişiya

Hêzek Îsraîlê ku ji 3 wesayîtên leşkerî pêk dihat, piştî ku derbasî devera nêzî têketina bajarokê El Refîd li gundewarê başûrê Quneytirayê bû, vekişiyan.

10 hezîran, 2025 17:26

NAVENDA NÛÇEYAN

Hêzek Îsraîlê ku ji 3 wesayîtên leşkerî pêk dihat, piştî ku derbasî nêzî têketina bajarokê El Refîd li gundewarê başûrê Quneytirayê bû û rêbendeke pişkinînê ji bo kontrolkirina welatiyan ava kir, vekişiya.

Hemwextî seferberiya hêzên (UN) li derdora bajarok û qutbûna tora internetê bê sedemên aşkera, heman hêza Îsraîlê derbasî bajarok bû û xwest ku civînek girtî bi rûspiyan re li dar bixe.

Beriya niha Navenda Çavdêriya Mafên Mirovan a Sûriyeyê (SOHR) diyar kiribû ku hêzeke Îsraîlê şeva duşem-sêşemê bi ser gundên Um El Îzam, Mişêrfe, Semdaniya Şerqî yên gundewarê Quneytirayê de girtibû.

Li gorî SOHR’ê, du tankên Îsraîlê ji baregeha Ednaniyeyê ya li naverasta gundewarê Quneytirayê derketin û ber bi gundên Um El Îzam û derdora El Mişêrfe ve çûn, bêyî ku bi sivîlan re tu dan û standin çêbibe. Lê vê yekê tirs û xofek di nava şêniyan de çêkir.

(ac/fr)

ANHA