Greva birçîbûnê li kantona Cizîrê berdewam dike

Bi sedan şêniyên navçeya Dirbêsiyê ya kantona Cizîrê, endamên sazî, meclis, nûnerên partiyan tev li greva birçîbûnê bûn ku di çarçoveya pêngava Însiyatîfa Gel a Ji bo Azadiya Rêber Abdullah Ocalan bi dirûşma "Ji Rêber Abdullah Ocalan re azad û ji pirsgirêka Kurd re çareseriya siyasî" de hatiye lidarxistin. 

Konê çalakiyê li qada Jina Azad hatiye vedan. Beriya çalakiyê, endama Rêveberiya Tevgera Ciwanên Şoreşger a Sûriyeyê Îlîza Hiso daxuyaniyek xwend. Di daxuyaniyê de hate ragihandin ku saziyên civaka sivîl û rêxistinên jinan ên navçeya Dirbêsiyê dê çalakiyên xwe di çarçoveya pêngava navneteweyî ya bi dirûşma "Ji Abdullah Ocalan re azadî û ji pirsgirêka Kurd re çareseriya siyasî" de berdewam bikin.

Dûre di çalakiyê de endama Meclisa Malbatên Şehîdan a navçeya Dirbêsiyê Foza Yusif axivî û tecrîda li ser Rêber Abdullah Ocalan û kiryarên dewleta Tirk a dagirker li dijî wê û girtiyên siyasî şermezar kirin.

Foza wiha domand: "Êrişên dewleta Tirk a dagirker ên li dijî Kurdistanê bi armanca bêdengkirina Kurdan, bi bin ketin. JI bo pêkanîna azadiya fîzîkî ya Rêber Abdullah Ocalan em ê têkoşînê mezin bikin."

Her wiha endama Rêveberiya Kongra Star Fatme Keleş axivî û destnîşan kir ku dewleta Tirk piştî çalakiyên şoreşgerî yê li çiyayên Kurdistanê êriş navendên stratejîk ên Cizîrê û Minbicê kirin.

Fatme bang li xelkê herêmê kir ku li hember êrişan li qadên berxwedanê bin.

Dûre bi nave Însiyatîfa Gel a navçeya Dirbêsiyê hevserokê Meclisa navçeyê Numan Erebo diyar kir ku dewleta Tirk ji dehan salan ve hewl dide çanda gelê Kurd têk bibe û bi tecrîdê wan hewldanan berdewam dike, lê belê bi saya fikr û felsefeya Rêber Abdullah Ocalan ew hewldan têk çûn.

Li gor Komîteya Amadekar çalakiya konvedanê wê du rojan berdewam bike.

Beriya wê jî di heman çarçoveyê de xelkê bajar û navçeyên kantona Cizîrê çalakiyên greva birçîbûnê li dar xistin.

(şx)

ANHA