‘Gerîla vîna pêkhateyên Kurdistanê ya li hember êrişên qirkirinê temsîl dikin’

Êrişên dewleta Tirk a dagirker ên bi çekên kîmyewî û qedexekirî li dijî Herêmên Parastinê yên Medyayê didomin. Hêzên Parastina Gel (HPG) bi daxuyaniyekê ku 29`ê Gulanê weşandibû, ragihandibû ku dewleta Tirk a dagirker di 2 rojan de 67 caran çekên qedexekirî bi kar anîne.

Li hember van êrişan, nerazîbûnên gelê herêmê zêde dibin. Şêniyên Tirbespiyê bang li raya giştî ya cîhanê û welatparêzan kir ku hevgirtî bin û van êrişan rawestînin.

Şêniya bi navê Mizgîn Lezgîn berxwedana HPG û YJA- Starê li hember êrişan silav kir û got: "Ew berxwedaneke destanî û dîrokî li hember dijmin nîşan didin."

Mizgîn piştgiriya berxwedana gerîla kir û wiha domand: "Gerîla nûnertiya berxwedana gelên bindest û pêkhateyan li hember siyasetên dagirkirin û mêtingkirinê yên dewleta Tirk, dike."

Şêniya bi navê Cîhan Yusif jî destnîşan kir ku divê piştgiriya berxwedana gerîla bê kirin ji ber ku ew hebûn û azadiya wan temsîl dikin û got dê heta serkeftinê bi dest bixin, piştgiriya gerîla bikin.

Şêniyê bi navê Xelîl Şindî jî diyar kir ku şervanên tevgera rizgariya Kurdistanê Kurdistan û gelên wê temsîl dikin û wiha domand: "Em nahêlin dewleta Tirk axa me dagir bike. Em ê li qadan bin li ber xwe bidin û serkeftinê bi dest bixin."

(şx)

ANHA