Gelê Bakur û Rojhilatê Sûriyeyê êrişên komên çete şermezar kirin

Komên çete yên Hemzat, Emşat, Sultan Murad û Nûredîn Zenkî yên ku dewleta Tirk perwerde kirin û di nava hêzên hikumeta demkî ya Sûriyeyê de ne, êrişên li dijî taxên Şêxmeqsûd, Eşrefiyê û Benî Zêd dewam dikin.

DIRBÊSIYÊ

Bi armanca şermezarkirina êrişan û piştgiriya gelê Şêxmeqsûd, Eşrefiyê û Benî Zêd ve şêniyan daxuyaniyek li Akademiya Civakî Demokratîk da. Hevserokê Meclisa Bajêr Alan Meîş daxuyanî xwend.

TIL HEMÎS

Bi sedan xelkê bajêr û gundewarên wê bi meşekê êrişên komên çete yên li dijî taxên Şêxmeqsûd, Eşrefiyê û Benî Zêd şermezar kirin.

Xwepêşandan ji pêş Navenda Çandê ya bajêr bi hildana alên QSDˊê û dirûşmên "Bijî berxwedana Şêxmeqsûd" dest pê kir.

Li navenda Kongra Star xwepêşandan veguherî çalakiyeke protestoyî. Li wir endama rêveber a Kongra Star a Til Hemîsê Efra El Ebas û endamê rêveber ê Meclisa Bajarê Til Hemîsê Emaş El Ebdullah axivîn. Axêveran diyar kir ku berxwedana gelê Şêxmeqsûd û Eşrefiyê berxwedana bi navê tevahî Sûriyeyiyên azad e, bi saya fedakariyên Hêzên Ewlekariya Hundirîn bersiva van êrişan tên dayîn.

Xwepêşandan bi piştgiriya berxwedana gelê Şêxmeqsûd, Eşrefiyê û Benî Zêd ên bajarê Helebê bi dawî bû.

REQA

Gelê kantona Reqa, endamên saziyên sivîl, Partiya Sûriya Pêşerojê, Partiya Yekitiya Demokratîk (PYD), endamên Kombûna Jinan a Zenûbiya, Meclisa Jinan a Sûriyeyê û endamên Tevgera Ciwanên Şoreşger çalakiyek protestûyî li pêş Qada Jin a başûrê bajêr li dar xist.

Hevseroka Meclisa Rêveber a kantona Reqayê Hêvîn Îsmaîl di çalakiyê de daxuyanî xwend. Di daxuyaniyê de hat gotin ku bi top, hawan û tankan êrişî taxên Helebê dikin. Ev sûcekî dermirovî ya zelal e.

DÊRAZOR

Meclisa Gelan a Demokratîk a kantona Dêrazorê bi daxuyaniyekê li pêş avahiya Rêveberiya Xweseriya Demokratîk a kantonê êriş şermezar kirin. Hevserokê Meclisa Gelan a Demokratîk a kantonê Fayiz El Bêk bi amadebûna nûnerên ji Meclisa Rêveber, endamên sazî, komîteyên jinan û komîteyên Kombûna Jinan a Zenûbiya daxuyanî xwend.

Di daxuyaniyê de hat diyarkirin ku hedefgirtina taxên şêniyan sûcekî dermirovî ye, zehmetiyên welatiyan zêde dikin û derfetên kêmkirina rageşiyê û pêkanîna aştiyê qels dikin.

Şêniyên piştgirî da berxwedana gelê Şêmxeqsûd, Eşrefiyê û Benî Zêd.

TEBQA

Xelkê kantona Tebqa û koçberên Efrîn-Şehba li dijî êrişên komên çete yên dewleta Tirk ên di nava hêzên hikumeta demkî de xwepêşandanek li dar xist.

Di xwepêşandanê de bi sedan gelê kantonê û koçber, endamên Rêveberiya Xweseriya Demokratîk a kantona Tebqa û desteyên wê, partiyên siyasî, Rêxistinên Civaka Demokratîk, hêzên leşkerî, meclisên sivîl, oldar, Kombûna Jinan a Zenûbiya û rêxistinên jinan amade bûn.

Xwepêşandan ji pêş kampa Azadiyê ya koçberan dest pê kir û li pêş avahiya Meclisa Malbatên Şehîdan a bajêr rewestiya.

Li wir berdevka Meclisa Kombûna Jinan a Zenûbiya ya bajarê Mensora Necah El Ehemed axivî. Necah da zanîn gelek caran li dijî taxên Şêxmeqsûd û Eşrefiyê êrişên tên kirin, ji Îlonê ve jî di dorpêçeke giran de ne.

Necah li ser navê gelê Tebqa û koçberan ev êriş bi tundî şermezar kir û diyar kir ku komên çete yên dewleta Tirk ên di nava hêzên hikumeta demkî de bi awayekî hovane û zanabûn êrişî taxên Helebê dikin.

Xwepêşandan bi diruşmên silavkirina berxwedana taxên Şêxmeqsûd, Eşrefiyê û Benî Zêd bi dawî bû.

DÊRIK

Li dijî êrişên ser taxên Helebê, koçberên Efrîn-Şehba, bi hezaran xelkê Dêrikê xwepêşandanek ji Qada Jinê ber bi kolana Kornîş ve li dar xist.

Li taxa Kornîş xwepêşandan rawestî, li wir endamê Partiya Yekitiya Demokratîk a Dêrikê Mehmûd Kalî êrişên li dijî taxên Helebê şermezar kirin û diyar kir ku ev êriş redkirina hikumeta demkî ji pirrengiya pêkhateyên Sûriyeyê re nîşan dide.

Serokê Hevgirtina Al El Beyt a Bakur û Rojhilatê Sûriyeyê şêx Sînan Sîdoş destnîşan kir ku yekrêzî bersiva rastîn a li dijî êrişên hikumeta demkî li dijî welatiyan e.

Sîdoş got taxên Şêxmeqsûd û Eşrefiyê modela berxwedanê ne, bi berxweadna xwe hebûn îsbat kir û çareser diyar kir.

TIRBESPIYÊ

Bi hezaran pêkhateyên bajarê Tirbepsiyê ji Kurd, Ereb, Suryan li dijî êrişên komên çete yên hikumeta demkî xwepêşadanek li dar xist.

Di xwepêşandanê de xwendekarên dibistanan beşdar bûn, qetilkirina zarokan bi destê komên çete yên hikumetê şermezar kirin.

Xwepêşandan ji pêş Komeleya Perwerdê ya li rojhilatê bajêr dest pê kir û li sûka navendî belav bû.

Xwepêşandan li pêş avahiya Meclisa bajêr sekinî. Li wir endama Însiyatîfa Gel Nalîn Temo axivî û êriş şermezar kir.

QAMIŞLO

Meclisa Xwendekarên Zanîngeha Rojava bi armanca şermezarkirina êrişên komên çete li dijî taxên Şêxmeqsûd, Eşrefiyê û Benî Zêd daxuyaniyek da.

Di daxuyaniyê de êrişî bi tundî hatin şermezarkirin û hikumeta demkî berpirsa van êrişan hat dîtin.

KOBANÊ

Bi hezaran Şêniyên Kantona Firatê di bin dirûşma "Dorpêç û êrişên li ser Şêxmeqsûd û Eşrefiyê, em şermezar û nelet dikin" li Qada Jina Azad meşek dest pê kir. 

Di meşê de şêniyan wêneyê zarokên şehîd, jin û birîndaran hatin rakirin û bê navber dirûşêmên "Bêjî berxwedana Şêxmeqsûd û Eşrefiyê","Asayîş","Berxwedan jiyane" berz kirin .

Meşê heta Qada Aşitiyê dewam kir. Li wir piştî deqeyek rêzgirtin, heveserokê Desteya Kar û Barên Civakî yê Kantona Firatê Ehmed Xoce êrişên li ser Şêxmeqsûd û Eşrefiyê şermezar kir û wiha got: "Piştî şoereşa Rojava gelê me li taxa Şêxmeqsûd û Eşrefiyê bi cih bûn û di nava hemû zehmetiyan re jiyan dikirin, her wiha di nava tarîtî û dorpêçan de jiyan dikir û berxwedaneke bê hempa didan meşandin. Lê gel bi hemû hêz û berxwedana xwe heta roja îro li ber xwe didan û her tim dijmin li ser taxên Şêxmeqsûd û Eşrefiyê êrişî dikirin."

Ehmed anî ziman ku gelê Şêxmeqsûd û Eşrefiyê xwedî hêz û vîna her xurtin û wiha got: "Em wek bajarê berxwedanê Kobanê li pişta gelê xwe ne û em ê her tim piştgiriya wan bikin û her tim em ji bo piştgirya gelê xwe amade ne."

Meş bi dirûşma "Bêjî berxwedana Şêxmeqsûd" û "Berxwedan jiyane" bi dawî bû.

HESEKÊ

Bi hezaran gelê bajarê Hesekê yê kantona Cizîrê û koçberên, bajarên Serêkaniyê û Efrînê bi armanca piştgiriya berxwedana şêniyan û Hêzên Ewlekariya Hundirîn -Helebê xwepêşandanek li dar xist.

Xwepêşandan ji Çerxerêya Kevokê ya li taxa Til Hecer ve dest pê kir û ber bi Çerxerêya Şehîd Serhed a li taxa Muftî ket rê.

Li çerxerêyê xwepêşandan veguherî mîtîngê. Endama Meclisa Bajarê Efrînê Gulistan Efrîn axivî, êrişên li dijî taxên Şêxmeqsûd, Eşrefiyê û Benî Zêd ên Helebê şermezar kirin.

Hevserokê Partiya Yekitiya Demokratîk (PYD) a Hesekê Ferhan Dawûd jî axivî. Dawûd êrişên komên çete yên dewleta Tirk ên di nava hêzên hikumeta demkî de şermezar kirin.

Xwepêşandan û kombûna girseyî bi diruşmên silavkirina berxwedanê bi dawî bû.

(fr)

ANHA