Gel bi daxuyanî û xwepêşandanan êrişên li dijî taxên Helebê şermezar kirin

Li bajar û bajarokên Herêma Bakur û Rojhilatê Sûriyeyê gel li ser pêyan e û bi daxuyanî û xwepêşandanan êrişên komên çete yên dewleta Tirk ên di nava hikumeta demkî de şermezar dikin.

TIL TEMIR

Bi sedan xelkê bajarê Til Temirê bi xwepêşandaneke girseyî êrişên li dijî taxên Helebê şermezar kirin û hevgirtina xwe bi berxwedana şêniyan re anî ziman.

Xwepêşandan ji Çerxerêya Qendîlê ya li têketina başûrê bajêr bi beşdariya girseyî dest pê kir.

Xwepêşandêr li kolanên sereke geriyan û diruşmên silavkirina berxwedana gelê Şêxmeqsûd, Eşrefiyê û Benî Zêd berz kirin û got ev êriş nikarin vîna gelan têk bibin û wê ev vîn bi ser bikeve.

Li pêş avahiya Meclisa Malbatên Şehîdan xwepêşandan veguherî mitîngê. Li wir endama rêveber a Kongra Star Sena El Samir, hevserokê Meclisa Malbatên Şehîdan Mihemed Seîd El Ehmed axivîn. Axêveran diyar kir ku ev êrişên nikarin vîna gelên azad têk bibin û hewlên têkbirina aramî û ewlehiyê wê li hember hevgirtina gelê herêmê û berxwedana wan bi bin bikevin.

Xwepêşandan bi diruşmên silavkirina berxwedana gel û Hêzên Ewlekariya Hundirîn-Helebê bi dawî bû.

HESEKÊ

Mala Jin bi daxuyaniyekê bi tundî êrişên li dijî taxên Helebê şermezar kirin.

Di daxuyaniyê de hat gotin ku tiştê li dijî taxên Helebê diqewime sûcekî dermirovî ye û li pêş çavên civata navneteweyî tê kirin, dewleta Tirk û hikumeta demkî berpirsiyara van êrişan hatin dîtin.

Gerînendetiya Tenduristiyê ya Hesekê bi heman mijarê daxuyaniyek da. Daxuyaniya gerînendetiyê li Nexweşxaneya Gel a li taxa Ezîzîiyê bi zimanên Kurdî û Erebî hat xwendin.

Di daxuyaniyên de êrişên li dijî taxan, nexweşxane û navendên tenduristiyê hatin şermezarkirin û hat gotin ev êriş êşên welatiyan û birîndaran zehmetir dikin.

DIRBÊSIYÊ

Bi sedan gelê bajêr, xwendekan, endamên saziyên sivîl, meclis, tevgerên ciwanan û jinan bi mijara piştgiriya berxwedana gelê Şêxmeqsûd, Eşrefiyê û Benî Zêd xwepêşandanek li dar xist.

Xwepêşandan ji pêş Parka Şehîd Zevîn dest pê kir û ber bi navenda Şaredariya Gel ket rê. Li wir, endamê Înîsiyatîfa Gel Silêman Xelîl axivî û ev êriş şermezar kirin.

Mala Jinan jî bi armanca şermezarkirin komkujî û êrişan daxuyaniyek da û got bêdengiya navneteweyî li hember van sûcan hevkariya wan nîşan dide.

HOL

Partiya Yekitiya Demokratîk û Meclisa Bajêr li pêş Komeleya Perwerdê bi beşdariya bi dehan welatiyan xwepêşandanek li dar xist.

Xwepêşandan veguherî çalakiyek protestoyî. Li wir hevserokê PYDˊê Emar Mûsa û endama Kongra Star Hese El Hemed axivîn. Axêveran êriş şermezar kirin û got armanca van êrişan xizmetî ajandeyên derve werin kirin û fitne di nava gelê Sûriyeyê de were derxistin.

Çalakî bi diruşmên silavkirina berxwedana gelê taxên Helebê bi dawî bû.

ŞEDADÊ

Meclisa Jinan a PYDˊê bi armanca şemerzarkirina êrişên li dijî gelê taxên Helebê daxuyaniyek da.

Di daxuyaniyê de bang li jin, ciwan û tevahî pêkhateyan hat kirin ku tev li têkoşîna aştiyane bibin û hevgirtina gel bikin.

Di dawiyê de berxwedana gelê Şêxmeqsûd, Eşrefiyê û Benî Zêd hat silavkirin.

TIL BIRAK

Gelê Til Birakê xwepêşandanek girseyî bi armanca piştgiriya gelê taxên Helebê li dar xist.

Xwepêşandan ji têketina rojavayê bajêr ve dest pê kir. Li çerxerêya naverasta bajêr xwepêşandan veguherî mîtîngê. Li wir hevseroka Meclisa Malbatên Şehîdan Buşra El Heloş axivî. Buşra êrişên çeteyên hikumeta demkî li dijî taxên Helebê şermezar kirin û bi sûcê şer wesifand.

Buşra di dawiyê de diyar kir ku gelê bajêr piştgiriyê didin şêniyên taxên Helebê re.

TIL HEMÎS

Li Til Hemîsê, xwepêşandan li ber avahiya Meclisa bajêr dest pê kir û bi mîtîngeke girseyî li Çerxerêya Garajê dewam kir.

Ji rêveberên Kongra Star Belqîs El Ebdullah axivî û diyar kir ku berxwedana gel dê hemû plan û êrişên çeteyan têk bibe.

Hevserokê Partiya Yekitiya Demokratîk ya Til Hemîsê Mihemed El Kemaş hikumeta demkî ji ber tawanên li dijî şêniyên Şêxmeqsûdê berpirsyar dît. Xwepêşandan bi dirûşmên "Bijî berxwedana Şêxmeqsûdê" bi dawî bû.

(fr)

ANHA