Festîvala Biharê ya Xwendekarên Zanîngeha Rojava dest pê kir

Festîvala Biharê ya 4'emîn ku ji aliyê xwendekarên Zanîngeha Rojavayê ve hatiye organîzekirin, dest pê kir. Pêşangeh ku bi armanca piştgiriya çalakiyên çandî û hunerî yên xwendekaran hatiye lidarxistin, dê sibe bi dawî bibe.

Di bernameya roja yekemîn a festîvalê de xwendekar û kadroyên perwerdeyê yên zanîngehê û gelek rewşenbîr amade bûn.

Bernameyê bi rêzgirtinê dest pê kir. Piştre cîgira hevserokên Kar û Barên Xwendekaran a Zanîngeha Rojava Evîn Ehmed axivî. Evînê festîval pîroz kir û anî ziman ku festîval bi armanca pêşxistina çand û hunerê di nava xwendekaran de tê birêxistinkirin.

Evîn Ehmed diyar kir ku zanîngeh ne tenê cihên fêrkirinê ne, lê di heman demê de navendên hunerî ji bo pêşxistina behreyan û xwepêşêxistinê ne.

Berdevkê xwendekaran Kerîm Xelîl jî got: "Ev çalakî ne festîvaleke ji rêz ê û şahiyek e, lê peyamek ji bo nifşên bê ye. Xwendekarên vir di wê baweriyê de ne ku çand û huner bingeha avakirina civakeke zane û pêşketî ne. Bi sebir, berxwedan û israra xwe hewl didin bibin beşeke avakirina civakeke zindî û pêşketî.”

 Mamosteyê zimanê kurdî Beşîr Mele Newaf û lêkolîner Sahil Heydo jî helbest xwendin.

Di festîvalê de pêşbirkeke stranan di navbera xwendekarên bi navên Lîlav Mihyedîn, Ronî, Sêvîn Oso, Leyla Mihemed û Barîn Murad de hat lidarxistin.

Hunermend Basil Can jî stran gotin. Xwendekaran li ber stranan govend gerand.

Di dawiyê de di navbera 8 komên ji mamoste û xwendekaran de pêşbirekeke çêkirina xwarinê pêk hat.

Li gorî komîteya amadekar, di roja duyemîn a festîvalê de, dê pêşangeheke wêne û destkariyan a xwendekarên Fakulteya Hunerên Bedew were vekirin. Di dawiyê de dê xwendekar werin xelatkirin.

(bb)

ANHA