Di şoreşa Rojava de rêwîtiya hunerê ya jinan

Di şoreşa Rojava (Şoreşa 19`ê Tîrmehê) de derfet çêbûn ku jin li qadên çand, wêje û hunerê xwe bi rêxistin bikin û bi pêş bixin. Êdî jin bi rêya xebatên xwe yên çandî, hunerî û wêjeyî bûn parçeyekî ji têkoşîna şoreşê.

JI KOMÊN BIÇÛK DEST PÊ KIRIN

Hunermend û hevseroka Tevgera Mezopotamyayê ya Çand û Hunera Demokratîk (TEV-ÇAND) Sumeya Mihemed bi boneya salvegera şoreşa Rojava ji ajansa me re axivî.

Sumeya Mihemed got: "Ez di serî de salvegera şoreşa Rojava li Rêber Abdullah Ocalan pîroz dikim û hemû şehîdênşŞoreşê bi bîre tînim. Sala 2012`an êriş li ser Rojava hebûn lê di nava wî şerî de gelek sazî jî hatin vekirin. Jinan hêz ji Şoreşê girtin ku şano pêşkêş bikin, stran bêjin û dengê xwe bilind bikin. Heke em îro û salên borî bidin ber çavan, em ê bibînin ku me têkoşîneke mezin daye meşandin û xwe pêşxistiye. Sala 2013`an me li bajarê Serêkaniyê û li Efrînê navendên xwe vekirin. Bajarê Serêkaniyê û Efrîn bi hunerê dihatin naskirin. Ji xwe piştre dewleta Tirk û çeteyên wê her du bajar dagir kirin û xwestin dawî li çanda me bînin. Lê me bi rêya huner û dengbêjiyê çanda xwe parast. Jinên Kurd li çiyayê Kurdistanê di şert û mercên şer de li tembûrê dixistin, me ilham ji wan girt û tev li xebatên çandî û hunerî bûn."

Sumeya Mihemed got hunera şoreşgerî ne tenê rêbazeke xweîfadekirinê ye û wiha pê de çû: "Bi rêya hunerê me têkoşîn û fedakariya ji bo nasname û azadiyê nîşan da, dîroka gelê Kurd ku hatibû paşguhkirin, belge kir. Di destpêka şoreşa Rojava de me ji komeke biçûk dest pê kir û niha me peymangeh û akademî vekirine. Di salên şoreşê de bi hezaran jin bûn helbestvan, stranbêj, derhêner, şanoger û wênesaz."

HÎLALA ZÊRÎN HATE AVAKIRIN

Tevgera Hîlala Zêrîn a Çandê ya Jinan sala 2015`an hate avakirin û kongreya xwe ya yekemîn sala 2016`an li herêma Cizîrê li dar xist. Li gelek bajar û bajarokên Rojava navend vekirin û kom ava kirin. Êdî jin li van navendan hatin perwerdekirin. Fêrî stranbêjiyê, lêdana alavên muzîkê, govend û şanoyê bûn.

Sumeya Mihemed ji bo xebatên Hîlala Zêrîn got: "Li hemû herêmên Rojava me navendên Hîlala Zêrîn vekirin. Êdî jinan bi rêya wênesazî, lêdana alavên muzîkê, stranbêjî û helperkê xwe dida îfadekirin. Her wiha me çanda pêkhateya Kurd, Ereb, Ermen û Suryan di hunerê de anî gel hevdû. Em çanda hemû pêkhateyên Sûriyeyê zindî dikin û diparêzin. Li ser çanda berxwedanê, lehengiya hevalên Şehîd û dîroka jinê me klîb çêkirin û me Mîhrîcana Şehîd Berçem Efrîn li bajarê Heleb û Kobanê lidar xist. Mihrecanê Şehîd Berçem Efrîn mînaka herî mezin a parastina çanda hemû pêkhateyên Sûriye ye. Me çanda Ermen, Kurd, Ereb, Çerkes, Aşûrî, Tirkmen û Suryanan li ser yek dikê anî gel hevdû."

Di dawiyê de Sumeya Mihemed wiha got: "Bi dengê xwe me parastina xaka xwe kir, berpirsyartiyeke mezin ji me tê xwestin. Em ê ji bo çand û hunerê têkoşîna xwe bidomîn in û projeya Rêber Abdullah Ocalan biparêzin."

(np)

ANHA