Rewşenbîr: Qetilkirina Sîpan Hiznî hewldana derxistina fitneyê ye

Li herêmê bi salan e hewldanên derxistina fitneyê pêk tên, niha jî hedefgirtin. Suîqestkirina şervanê Lîwaya Hesekê Sîpan Hiznî jî yek ji van bûyeran e.

Der barê mijarê de endamên Yekitiya Rewşenbîran a Cizîrê-Girkê Legê ji ajansa me re axivîn.

Şêxmûs Cuma diyar kir ku şehîdxistina Sîpan Hiznî bi armanca derxistina xerabkirina ewlehiyê li herêmê û nakokiyên di nava gelan de pêk hatiye û got: “Suîqestkirina Sîpan Hiznî sûcên ku DAIŞ`ê pêk dianî vegerand bîra me.”

Şêxmûs Cuma got: “Mîna van kiryaran dihêle ku rê li ber derxistina fitneyê di navbera pêkhateyên herêmê vebe, bi taybet di navbera Kurd û Ereban, ev yek xelkê herêmê ber bi şerên nû piştî ew qas salên berxwedanê dibe.”

Şêxmûs Cuma da zanîn ku entegreya rastî beşdariya Kurd, Ereb, Suryan û pêkhateyên din pêk tê, divê di pêvajoyê de jî maf û azadiya pêkhateyan bê misogerkirin, divê her pêkhate mafê xwe yê ziman, çand û nasnameyê bi dest bixe, bi hev re jiyan li ser paşguhkirinê pêk nayê.

Şewket Muslim diyar kir ku mîna van kiryaran gefan li rewşa istiqrarê ya li herêmê dixwe û got: “Bûyera suîqestkirina Sîpan Hiznî nayê qebûlkirin.”

Şewket Muslim wiha pê de çû: “Dibe ku ev bûyer ji bo zêdekirina rageşiya di navbera Kurd û Ereban de bê bikaranîn, xelkê herêmê naxwazin vegerin rewşa şer, çi doz hebe divê dûrî mijarên tundiyê bi danûstendinan bê çareserkirin.”

Şewket Muslim destnîşan kir ku qonaxa heyî ji bo avakirina Sûriyeyeke yekgirtî, demokratîk û bi ewle bi hacetî hevpariyê ye, heke îradeya diyalogê û rêzdariya li hemberî mafê hemû pêkhateyan hebe, sûriyeyî dikarin bi hev re bijîn.

(sb)

ANHA