Bihabûna sotemeniyê li Kobanê barê şêniyan girantir kiriye

Li bajarê Kobanê bilindbûna buhayê sotemeniyê krîzeke kûr di jiyana rojane ya şêniyan de çêkiriye û astengiyên mezin li pêşiya peydakirina pêdiviyên bingehîn derxistiye.

Peydakirin û kirîna mazotê ji bo malbatan bûye xemeke mezin, zêdebûna buhayên sotemeniyê rasterast bandorê li buhayê kel û pelan kiriye û di jiyana şêniyan de zehmetiyeke mezin çêkiriye.

Ajokarê bi navê Mihemed Yaremaz anî ziman ku piştî biryara hikumeta veguhêz a bilindkirina buhayê sotemeniyê rewşa aborî û zehmetiyên jiyanê girantir bûne, her wiha da zanîn ku ev biryar rasterast bandorê li buhayên xwarinê û veguhastinê dike û bûye sedema nerazîbûneke berfireh di nav gel de.

Mihemed Yaremez diyar kir ku ev bihabûn jiyana wan a rojane parçe dike, çûyîn û hatina di navbera gund û bajaran de pir biha dike.

Zuhêr Bilal Osê ku ew jî ajokariyê dike, diyar kir ku ev biryara bihabûna sotemeniyê nayê qebûlkirin, ji ber ku çûn û hatina di navbera bajaran û gundan de gelekî zehmet bûye û şênî nikarin kirêya rê bidin.

Osê got: “Eger em buhayên rêwîtiyê bilind nekin, em zirarê dikin, eger em bilind bikin jî şênî nikarin bidin.”

Daxwaza şêniyan ew e ku piştgiriyeke zêdetir ji bo sotemeniyê were dabînkirin da ku buha ji bo her kesî guncaw bin.

(so)

ANHA