Di Civata Eşîr û Pêkhateyên Firatê de bangên ji bo xurtkirina têkiliyan û aştiya sivîl

Di bin dirûşmeya "Bi rihê xweşbînî û jiyana hevbeş a aştiyane, em nirxên civaka xwe biparêzin" de, Civata Eşîr û Pêkhateyên Firatê îro li Zanîngeha Kobaniyê li bajarê Kobanê hate lidarxistin. Şêx û rûspiyên eşîrên Ereb, Tirkmen û Kurd ên li herêma Kobanê, fermandarên leşkerî yên Hêzên Sûriyeya Demokratîk û hêzên hikûmeta demkî, ligel nûnerên Meclîsa Sûriyeya Demokratîk û partiyên siyasî, beşdarî civatê bûn.

Her wiha Hevseroka Daîreya Têkiliyên Derve ya Rêveberiya Xweser Îlham Ehmed, Alîkarê Wezîrê Parastinê Semîr Oso, Şêwirmendê Serokatiya hikûmeta demkî Cîhad Îsa El Şêx û, Cîgirê Fermandarê Firqeya 60emîn Çiya Kobanê jî beşdarî civatê bûn.

Li ser navê eşîrên Kurd ên herêma Kobanê, Şêro Michan axivî û got, "Civakên me îro pir hewcedarê ji nû ve avakirina baweriyê di navbera endamên xwe de ne, her wiha hewcedarî vejandina nirxên hezkirin, lihevhatin û hevkariyê ne, dûrî zimanê nefretê, û dabeşbûnê. Ntew ne li ser nefret û pevçûnê, lê li ser hezkirin, têgihîştin û rêzgirtina ji bo jiyana hevbeş xwe ava dibin. "

Şêx Huseyîn Ebû Ednan, ji eşîra El Ewn, li ser navê eşîrên Ereb ên Firatê axivî û bal kişand ser girîngiya parastina yekîtî, redkirina nakokiyan û xebata bi hev re ji bo piştgiriya aramiya civakî û pêşxistina rihê hevkariyê û têgihîştinê di navbera gelên herêmê de.

Nusret Kitkanî, yek ji rûspiyên eşîra Kitkan a herêma Kobanê, li ser navê Şêx Necîb Besrawî yê ji eşîra Beraziyan û diyar kir ku divê mekanîzmayên ji bo xurtkirina têkiliyan û hevkariya di navbera eşîrên Ereb û Kurd de werin lêkolînkirin da ku ewlehiya civakê pêk were û xizmeta berjewendiya giştî were kirin.

Her wiha Şêx Muharib El Hemûd, rêveberê Rêveberiya Eşîr û Qebîleyan li Parêzgeha Helebê, li ser navê Cîhad Îsa El Şêx, şêwirmendê serokê hikûmeta demkî, axivî û got: "Em îro li ser axa Kobanê dicivin da ku serdemek nû vekin, li ser ax û li welatekî ku cihê nakokî an zimanê nefretê lê tune ye."

El Hemûd bal kişand ser têkiliyên dîrokî yên ku Ereb û Kurdan li ser vê axê digînin hev, ku modelek jiyana hevbeş û biratiyê nîşan didin. Her wiha da zanîn ku divê civînên hevbeş berdewam bikin ku bibin egera xurtkirina baweriyê û xurtkirina tevna civakî, û diyar kir ku gelên Kurd û Ereb li ser vê axê şirîkên çarenûsek hevpar in. El Hemûd diyar kir ku divê rihê hezkirin û hevkariyê were xurtkirin, û aştiya sivîl berpirsiyariyeke giştî ye û ji bo parastina ewlehî û aramiyê hewldanên hevbeş ên her kesî hewce dike.

Alîkarê Wezîrê Parastinê yê hikûmeta demkî ya Sûriyê li herêma Rojhilt, Semîr Oso jî di civatê de axivî û got: "Bi navê xwe û Wezîrê Parastinê yê Sûriyê yê birêz, em vê civîna bi nirx pîroz dikin. Sûriyê di 14 salên borî de ji qonaxên pir hesas û dijwar derbas bûye, di nav de hilweşîna rejîma Baasê jî hebû. Li welêt pevçûnên navxweyî û gelek şer çêbûne. Îro, em ji bo ji nû ve aktîvkirina yekbûna neteweyî û avakirina Sûriyeyeke nûjen dixebitin. Nêrîneke nû li ser bingeha ji nû ve avakirina neteweyê hatiye pêşkêş kirin, û her kes berpirsiyariya pêşvebirina Sûriyeyê hildigire ser xwe."

Fermandarên Firqeya 72 û 60an a hikûmeta demkî, Tuggeneral Amir Aqil û Tuggeneral Ewad El Casim jî axivîn û diyar kirin ku "Sûriyeyê îro derfeteke dîrokî heye ku bibe modelek jiyana hevbeş û biratiyê di navbera hemû pêkhateyên xwe de."

Hevseroka Daîreya Têkiliyên Derve ya di Rêveberiya Xweser Îlham Ehmed, got: "Em peyamekê ji gelê Sûriyeyê û hikûmeta Sûriyeyê re dişînin ku avakirina Sûriyeya nû pêwîstî bi garantîkirina mafên hemû gel û komên ku di demên berê de ji mafên xwe bêpar mane heye. Bi taybetî, divê mafên jinan werin garantîkirin." 

Îlham Ehmed ev lê zêde kir, "Jin di demên berê de roleke qehremanî lîstine, û ji ber vê yekê, em têkoşîna xwe ji bo avakirina Sûriyeyeke yekgirtî ku tê de aştî û aramî serdest be, dijwartir dikin. Peyama me zelal e."

Li ser navê eşîrên Tirkmen, Şêx Xalid El Hecî Ebdulxenî axivî û got, "Îro, em li vir di vê civîna serbilindî û rûmetê de li ser axa Kobanê dicivin. Em, eşîrên Tirkmen, ji hêla bav û kalên xwe ve fêr bûne ku em beşdarî xurtkirina têkiliyên biratiyê bi hemû pêkhateyên civaka Sûriyeyê re bibin."

Di dawiya civatê de, şandeya hikûmetê serdana avahiya Zanîngeha Kobaniyê kir.

(k)