Ciwanekî di îşkencexaneyên hikumetê de jiyana xwe ji dest da

Li Tertûsê ciwanekî di girtîgeha hêzên hikumeta veguhêz de jiyana xwe ji dest da.

16 cotmeh, 2025 15:25

NAVENDA NÛÇEYAN

Li gorî agahiyan, ciwanê bi navê Saîr Şedûd di girtîgehên hêzên hikumeta veguhêz a Sûriyeyê de ji ber îşkenceyê jiyana xwe ji dest daye.

Saîr Şedûd (30) ji navçeya Sefsafa ya Tertûsê ye û karê belavkirina nan dikir.

Çavkaniyan diyar kir ku çend roj berê dema ku Saîr Şedûd li nuqteyeke belavkirina nan bû, kesek li motorsîklêtekê siwarbûyî bi ser nuqteyê de girt û nîqaşeke tund di navbera wan de çêbû. Hate diyarkirin ku li ser vê bûyerê hêzên hikumeta veguhêz Saîr Şedûd destgîr kir.

Hate zanîn ku tevî ku şahidan û rapora pêşîn a navenda Sefsafayê piştrast kir ku Saîr bê sûc e, lê êrişkar hat berdan û Şedûd sewqî Girtîgeha Navendî ya Tertûsê hat kirin.

Çavkaniyan da zanîn nexweşiya dil bi Saîr re hebûye û destnîşan kir ku di girtîgehê de bi rojan îşkenceyên derûnî û fîzîkî lê hatine kirin, di encamê de rewşa wî ya tenduristiyê xirab bû û destwerdana bijîşkî yan çavdêriya qanûnî nehat kirin, di encamê de jiyana xwe ji dest da.

(bb)