Çalakiyên şermezarkirina êrişên dewleta Tirk di roja duyemîn de didomin

Dewleta Tirk a dagirker bi awayekî hovane êrişî Herêmên Parastinê yên Medyayê dike. Ji bo şermezarkirina van êrişan, duh li gelek navçe û bajarên herêma Bakur û Rojhilatê Sûriyeyê û Helebê meşên girseyî li dar ketin. 

Meş li kantona Reqa, kantona Efrîn û Şehbayê û kantona Cizîrê li dar ketin. Li kantona Minbicê û kantona Dêrazorê û bajarê Helebê jî rêxistinên civakî daxuyanî dan û êrişên dewleta Tirk a dagirker şermezar kirin û banga piştgiriya HPG`ê kir.

Bi sedan şênî, nûnerên saziyên Rêveberiya Xweseriya Demokratîk, partî, rûspiyên êlên Kurd û Ereb, rêxistinên civakî yên kantona Cizîrê û endamên saziyên çalakî li dar xistine, tev li meş û dayîna daxuyaniyan bûn.

Li Reqayê endama rêveberiya Yekitiya Jinên Ciwan a kantonê, Hedîl Îsmaîl axivî û got: "Em piştgiriya HPG`ê û hêzên leşkerî yên li herêmê dikin."

Endamê rêveberiya Meclisa Rêveber a kantonê Edanan Îbrahîm jî diyar kir ku dewleta Tirk a dagirker ji êrişan armanc dike ku projeya neteweya demokratîk têk bibe û ji bo ku bigihêje wê armancê bi hikumeta Iraqê li hev dike û PDK`ê li hemberî HPG`ê dide şerkirin.

Di çalakiya li kantona Efrîn û Şehbayê de hatiye lidarxistin, endamê Meclisa Rêveber a Rêveberiya Xweseriya Demokratîk a kantona Efrîn û Şehbayê Ferhan Kobanê axivî û destnîşan kir ku Kurdistanî rûbirûyî şerê qirkirinê bi destê dewleta Tirk a dagirker û hin xayînan in.

Di meşa li navçeya Tirbesiyê de endama Kongra Star a navçeyê Munteha Mehmûd jî got pêkhateyên navçeyê piştgiriya HPG`ê dikin û êrişên li ser herêmê îsbat dikin ku pergala rêveberî û leşkerî ya ku gelê herêmê ava kiriye, rast e û dikare timayên aliyên li dijî wê têk bibe.

Di heman çalakiyê de hevserokê Meclisa Partiya Yekitiya Demokratîk (PYD) şaxê navçeya Tirbespiyê Ebdurehîm Hiso diyar kir ku vîna gelê herêmê û vîna HPG`ê dê li hemberî timayên dewleta Tirk û hevkarên wê bibe yek.

Endamê Meclisa Malbatên Şehîdan a navçeya Til Hemîsê Canpolat Yusif di meşa li navçeyê de li dar ketiye, axivî û diyar kir ku li dijî HPG û gelê herêmê û berxwedana wan komployeke navneteweyî tê kirin û armanca wê têkbirina jiyana hevbeş û aştiyane ye.

Di heman çalakiyê de endama Kongra Star a navçeya Til Hemîsê Xaliye El Xidir bang kir ku piştgiriya HPG`ê bikin ji ber ku HPG`ê di şerê gelên herêmê li dijî DAIŞ`ê de, herêm bi tenê nehişt û piştgiriya wan kir.

Li Til Koçerê hevserokê Meclisa Navçeyê Newaf El Cedan û endamê Desteya Rûspiyan a Bakur û Rojhilatê Sûriyeyê Mehmûd El Salih axivîn û bang li hikuemta Iraqê û gelê li Başûrê Kurdistanê kir ku xwe naxapînin û guh nedin planên dagirkirinê yên dewleta Tirk û li hemberî wê serî hildin.

Her duyan soz da ku êlên ereb û rûspiyên wan piştgiriya berxwedana HPG`ê ya li hemberî dewleta Tirk a dagirker dikin.

Li bajarê Helebê Meclisa Jinan a Meclisa Malbatên Şehîdan a Helebê daxuyaniyek da. Di daxuyaniyê de hate desntîşankirin ku divê kiryarên terorsît ên dewleta Tirk bên rawestîn û bang li her kesî welatparêz hate kirin ku piştgiriya berxwedana şoreşgerî bikin. Her wiha bang li rêxistinên navneteweyî hat kirin ku sûcên dewleta Tirk a dagirker rawestînin.

Meclisa Malbatên Şehîdan kantona Minbicê daxuyaniyek da. Di daxuyaniyê serdana Erdogan ji bo Iraqê hate şermezarkirin û hate destnîşankirin ku nîqaş û li hevkirinên hatine kirin, li dijî gelê herêmê ne û Tirkiye dixwaze Iraqê bike şirîkê xwe di êrişên li dijî HPG`ê de.

Di daxuyaniyê de bang li partiyan hate kirin ku axa Iraqê û Başûrê Kuristanê biparêzin û li hemberî wan hewldanên dagirkeriyê tê bikoşin.

Bi dehan şêniyên kantona Dêrazorê çalakiyek li dar xist. Rûspiyên êlên kantonê tev li çalakiyê bûn. Di çalaliyê de bang li êlên ereb ên li Iraqê hate kirin ku li hember planên Tirkiye yên li Iraqê bibin yek û hate destnîşankirin ku Tirkiye dixwazin herêmên din ên Kurdistanê dagir bike.

Her wiha bang hate kirin ku rê li pêşiya hevkarên dewleta Tirk bê girtin ku di dagirkirina welêt de piştgiriya dagirkeran dikin û hesabê ji xayînan bê xwestin.

(şx)

ANHA

HELEB

MINBIC

ŞEHBA

Tirbespiyê

Til Hemîs

Til Koçer

DÊRE ZOR