Çalakiya konvedanê ya Tebqayê bi dawî bû

Di çalakiya konvedanê ya îro de xelkê herêmê, nûnerên ji Desteya Tendurîstiyê, Jîngehê, Enerjî, Ciwan û Werzîşê, Perwerde, Aborî û Çandiniyê, Jin, tevgerên jinan, Meclisa Kombûna Jinan a Zenûbiya, Rêxistinên Civaka Demokratîk, Yekitiya Şaredariyan û Meclisa Sivîl a Tebqa beşdar bûn.

Di çalakiya roja duyemîn û ya dawî de gelek axaftin hatin kirin. Axêveran diyar kir ku komploya navneteweyî ya li dijî Rêber Abdullah Ocalan de komploya astengkirina çareserkirina dozên Rojhilata Navîn û paşguhkirina doza Kurd e.

Dûre sînevîzyonek li ser komploya navneteweyî hat pêşkêşkirin.

Çalakî bi daxuyaniyekê bi dawî bû. Rêvebera Meclisa Kombûna Jinan a Zenûbiya ya Tebqa Huda El Elî daxuyanî xwend. Di daxuyaniyê de hat gotin 25 sala di ser têkoşîn û berxwedana ku Rêber Abdullah Ocalan li girtîgeha Îmraliyê raber dike de derbas dibe û hîna dewleta Tirk a dagirker sîstema êşkence û qirkirinê ku têkiliyên wê bi tu qanûnên hiqûqî re nîn e ferz dike. Her wiha nahêle ne parêzer ne malbat serdana wî bikin.

Di daxuyaniyê de hat diyarkirin ku têgihîştina gelê Bakur û Rojhilatê Sûriyeyê ji van siyasetan re hişt ku ew têkoşînê bilind bikin û ji bo şermezarkirina komployê dakevin qadan û banga şikandina pergala êşkence û qirkirinê bikin. Ji ber ku azadiya Rêber Abdullah Ocalan misogeriya yekane ya çareserkirina tevahî pirsgirêkên li herêmê ye.

Di daxuyaniyê de bang li rêxistinên navneteweyî, hiqûqî, mirovî û CPTʹyê hat kirin ku bi cidî rola xwe bilîzin û zextê li desthilatên Tirk bikin ku Rêber Abdullah Ocalan serbest berde.

Di dawiyê de soza hat dayîn ku ew ê komployê bi dawî bikin, dîwarên Îmraliyê bişikînin û Rêber Abdullah Ocalan bi fîzîkî azad bikin.

(fr)

ANHA