Bi minasebeta Hefteya Qehremaniyê şehîd hatin bîranîn

Meclisa Saziya Malbatên Şehîdan li avahiya Partiya Yekitiya Demokrat a Amûdê, bi minasebeta Heftaya Qehremaniyê, 24 şehîd bi merasîmekê bi bîr anîn.

Endam û rêveberên Meclisa Saziya Malbatên Şehîdan û şêniyên Amûdê di merasîmê de amade bûn.

Merasîm ji bo şehîdan bi deqeyeke rêzgirtin dest pê kir. Di merasîmê de endamê Meclisa Saziya Malbatên Şehîdan Abdulbaqî Elî Dawî axivî û bixêrhatina mêvanan kir.

Dawî qala derketina Rêber Abdullah Ocalan û berxwedana pêşengên PKK’ê kir û wiha axivî: “PKK partiya şehîdan e, lewma şehîdên me ji bo azadiya gelê xwe bê teredut jiyanê xwe feda kir. Lazim e ji her demê bêhtir em li pey şopa Mazlûm, Kemal û Xeyrî bin.”

Hevserokê Meclisa Saziya Malbatên Şehîdan Zîwer Elî jî di axaftinê xwe de bal kişand ser Hefteya Qehremaniyê û qala rastî û berxwedana Rêber Abdullah Ocalan kir.

Zîwer Elî di axaftinên xwe de şehîdên Amûdê yên ku di dîrok û cîhên cuda de şehîd bûbûn, bi bîr anîn û diyar kir ku bi pêşengiya Rêber Abdullah Ocalan rastiya Mazlûm, Kemal û Xeyrîyan hatiye afirandin û axaftinê xwe wiha domand: “Rêber Apo li dijî pergala ku di nava gelên herêmê de tirs dabû avakirin, tê koşiya û tirsa li ser hemû gelên herêmê şikand û hemû polîtîkayên sîstemên dagirker pûç kirin. Lewma gelek lehengên vî gelî, di vê rêyê de canê xwe bi qehremanî feda kir. Em bi rêzdarî wan bi bîr tînin û em li beramberî Rêber Apo û şehîdan soza xwe dubare dikin.”

Piştî axaftinan der barê Hefteya Qehremaniyê de nirxandinên Rêber Abdullah Ocalan û pêşengên PKK’ê sînevîzyonek hate nîşandan.

(bm)

ANHA