Bendava Zexîrayê hatiye paşguhkirin

Bendava Zexîrayê sala 1978`an lê kirine û yek ji çavkaniyên avê yên gundewarên Çilaxayê ye. Bendav 12 km dirêj e. Ev bi salan e nema kesek girîngiyê dide wê, darên li dora wê birîne û hatiye paşguhkirin. Şêniyên herêmê ji aliyên têkildar xwest bendav were parastin. Berî ku ava wê kêm bibe û darên wê bibirin şêniyên herêmê diçûn wê derê seyranê.

Salên borî ava bendavê kêm bû û nema kesekî girîngî da bendavê. Piştre jî xelkê darên derdora bendavê birîn û hate paşguhkirin.

Yek ji welatiyên herêmê Ebdulrehman Lewend ji aliyên têkildar daxwaz kir ku girîngiyê bidin bendavê, paqij bikin, li derdora wê daran biçînin û parastina wê bikin.

Mihemed Selîm Şakir jî got xelk dikare sûdê ji ava bendavê wergire û projeyên aborî li derdora bendavê vekin.

Beşa Çandiniyê û Çavkaniyên Avê ya Çilaxayê diyar kir ku têkildarî bendavê û herêmê plansaziyên wan nîn in.

Ji bajarokê Tirbespiyê endezyarê çandiniyê Ramî El Mudehî têkildarî mijarê got: "Parastina çavkaniyên avê bingeha jiyanê ye, divê civak bi hev re van çavkaniyên avê û xwezaya derdora wê biparêze. Çi qasî daristan, ax û herêmên derdora çem, kanî û bendavan werin parastin ew qasî ava binerd tê parastin. Parastina çem, kanî û bendavan ne tenê ji aliyên têkildar tê xwestin, tevahiya civakê divê berpirsyar be.”

Li herêma Cizîrê 7 bendav hene; bendavên Mizgeft û Maşûqê li Tirbespiyê, Zexîra û Çilaxayê li Çilaxayê, Hiyaka li gundewarên Girke Legê, Sefan li gundewarên Dêrikê û bendava li başûrê Hesekê.

(np)

ANHA