Bazarên kantona Firatê bi rengên Newrozê xemilîne

Bi nêzîkbûna Newrozê re, bazarên kantona Firatê bi qumaşên rengîn û cil û bergên folklorîk ên kurdî hatine xemilandin. Wekî salên din, îsal jî li bazar qerebalix in û dikan bi cil û bergên folklorîk ên kurdî tijî bûne.

Têkildarî amadekariyên Newrozê, şêniyên Kobanê ya kantona Firatê nêrînên xwe anîn ziman.

Ebdilqadir Nebo ku cil û bergên kurdî didirû, wiha got: “Tevî êrişên dewleta Tirk a dagirker ên li ser herêmê jî vîna gel xurt e, gel dîsa amadekariyên xwe ji bo Newrozê dike.”

Nebo wiha pê de çû: “Jin bi cil û bergên xwe yên kurdî yên wekî meles, şeir, îcqor, kiras, xeftan û benvank qadên Newrozê dixemilînin.”

Ferîha Beko jî ku ji bo Newrozê amadekarî dikir, wiha got: “Newroz ji bo me Kurdan rojeke pîroz e û dîrokî ye. Me dest bi amadekirina cil û bergan kiriye ji bo ku em Newroza xwe bi bedewbûna xwe pêşwazî bikin. Lewma ez hatime bazarê da ku pêdiviyên pêwîst ji bo xwe û zarokên xwe bikirim.”

Ferîhayê wiha lê zêde kir: “Em bi hêvî ne ku Newroza îsal bibe Newroza aştî, demokrasî û azadiyê ji bo hemû gelê Sûriyeyê, em ê bi cil û bergên xwe yên kurdî Newroza xwe bi coş û moral pêşwazî bikin.”

ANHA