‛Bawer in ku serkeftin para wan e’

Ji 8'ê Çileya ve bi hezaran şêniyên Herêma Bakur û Rojhilatê Sûriyeyê bi hemû pêkhateyên xwe yên Kurd, Ereb, Ermen û Turkmen berê xwe didin Bendava Tişrînê ku bendavê ji êrişên dewleta Tirk a dagirker biparêzin. Tevî êrişên balafirên şer û yên bêmirov ku di encamê de 25 welatî di nav de rojnamevan, siyasetmedar, rêveber û werzîşvan şehîd bûn, dîsa jî berxwedana wan di roja 68'an de bi moraleke mezin didome.

Şêniyên Bakur û Rojhilatê Sûriyeyê bi çalakiyên curbecur, moraleke mezin û nimêjên înê rojên xwe yên li bendavê derbas dikin. Ew bendav jî êdî bi berxwedana dîrokî tê naskirin.

Di kombûna nobedarên ji Dêrazor, Reqa, Tebqa û yên kantona Firatê de, ajansa me nêrîna welatî Fatme Îbrahîm a ji Reqayê girt. Fatme wiha got: "Em hatine Bendava Tişrînê, bendava berxwedanê. Serkeftin wê para me be. Şêniyên Reqayên ji hefteyekê ve li bendavê ne û bi moraleke mezin nobedê digirin."

Fatme Îbrahîm wiha domand: "Em demên xwe bi stran û govendê derbas dikin. Divê tevahî gelê Bakur û Rojhilatê Sûriyeyê berê xwe bide Bendava Tişrînê û tev li berxwedanê bibe, ji ber ku ew bendava serkeftin û azadiyê ye."

Welatî Ehmed Yabse yê ji Kobanê jî destnîşan kir ku her çiqas dewleta Tirk a dagirker êrişên xwe giran bike dîsa jî berxwedana wan wê bidome û kes wê nikaribe îradeya wan têk bibe.

(mh/fr)

ANHA