‛Aştî bi azadiya Rêber Apo ve girêdayî ye’

Der barê banga dîrokî ya Rêber Abdullah Ocalan de şêniyên Herêma Bakur û Rojhilatê Sûriyeyê got aştî bi pêkanîna azadiya fîzîkî ya Rêber Abdullah Ocalan û misogerkirina mafên gelê Kurd ve girêdayî ye.

ROJANE

27 sibat, 2025 21:28

NAVENDA NÛÇEYAN

Şêniyên Herêma Bakur û Rojhilatê Sûriyeyê diyar kir ku heta azadiya fîzîkî ya Rêber Abdullah Ocalan pêk neyê, aştî pêk nayê û mafên wan ên dîrokî misoger nabin.

Ajansa me ji nava girseya ku ji bo guhdarkirina li banga Rêber Abdullah Ocalan kom bûn, nêrîn girtin.

‘BANGA AŞTÎ Û AZADIYÊ JI BO GELÊN HERÊMÊ’

Şêniyê bi navê Îdrîs Yûnis ê ji bajarê Til Temirê got: “Îro rojeke dîrokî ye. Banga Rêbertî banga aştî û azadiyê ji bo tevahî gelên herêmê û cîhanê ye. Em bi Rêbertî û peyama wî bawer in. Em pê re ne. Rêbertî banga azadî, demokrasî û biratiya gelên herêmê dike."

Şêniyê bi navê Ehmed Heyder jî diyar kir ku banga Rêber Abdullah Ocalan banga aştiyê ye û nîşan dide ku gelê Kurd gelekî azadîxwaz , aştîxwaz û li dijî hemû cûreyên tundiyê ye.

‘PEYAMA RÊBERTÎ AŞTÎ Û AZADÎ YE’

Welatî Remziye Behcet Semawî ya ji bajarê Hesekê got: “Em îro ji bo guhdarkirina banga dîrokî ya Rêber Abdullah Ocalan kom bûn. Hêviya me ya tekane ew e ku azadiya fîzîkî ya Rêber Abdullah Ocalan were pêkanîn û êrişên li dijî Herêma Bakur û Rojhilatê Sûriyeyê werin rawestandin.”

Welatî Kemal Hiso piştgiriya xwe ji fikrên Rêber Abdullah Ocalan û banga wî ya aştiyê re nîşan da û got: “Banga Rêbertî çareseriya hemû pirsgirêkan e.”

Welatî Yazî Hesen Betal a ji bajarê Qamişloyê got: “Em bi banga dîrokî ya Rêbertî pir kêfxweş in, lê belê em wekî dayikên şehîdan ne bi çekdanînê re ne. Em dev ji Rêber û çeka xwe bernadin.”

Dayika şehîd Têkoşîn, Suad Xelef jî got: “Em çekê bernadin. Bila Erdogan li benda vê yekê nemîne. Planên wî me naxapînin. Xwîna şehîdên me vala naçe.”

Xwişka şehîd Luqman û şehîd Mihemed, Xaliye Mihemed Seîd Hisên got: “Bila dijmin bizane ku em ê Rêberê xwe azad bikin û em dest ji wî û ji çeka xwe berî pêkanîna azadiya fîzîkî ya Rêber Abdullah Ocalan û misogerkirina mafên Kurdan, bernadin.”

(mh/fr)

ANHA

HESEKÊ

QAMIŞLO

TIL TEMIR