40 koçberên Kurd ji Lîbyayê vedigerin Başûrê Kurdistanê

40 koçberên ji Herêma Federal a Başûrê Kurdistanê ku zêdetirî 2 mehan li Lîbyayê di girtîgehê de bûn, îro dest bi vegera xwe bo Hewlêrê kir.

25 cotmeh, 2025 21:38

NAVENDA NÛÇEYAN

Berpirsê Balyozxaneya Iraqê ya li Lîbyayê Ehmed Sehaf diyar kir ku 40 koçberên Hikûmeta Herêma Kurdistanê di zindanên Lîbyayê de hatine dîtin û dê werin vegerandin.

Ehmed Sehaf da zanîn ku ev koçber niha ber bi Tirkiyeyê ve bi rê ketine û biryar e ku ji bo Herêma Federal a Başûrê Kurdistanê ve werin vegerandin.

Vegerandina koçberan bi koordîneya hikumeta Başûrê Kurdistanê pêk hat û li gorî agahiyan, piraniya koçberan niştecihên Îdareya Serbixwe ya Raperîn û Silêmaniyê ne ku dixwestin bigihîjin Ewropayê, lê li Lîbyayê hatine girtin.

Di heman demê de, xebat ji bo vegerandina 35 koçberên din ên Kurd yên ku berê li Lîbyayê hatibûn dîtin, berdewam dike.

Pêvajoya vegerandina van koçberan piştî daxwaza malbatên wan û hewldanên aliyên peywendîdar ên li Başûrê Kurdistanê ji bo rizgarkirina wan ji şert û mercên dijwar yên kampên li Lîbyayê tê.

Bi hezaran welatiyên Kurdistanê ji ber bêhêvîtî û nebûna derfetên kar reviyane welatên Ewropayê. Lê gelek ji wan di rê de asê mane an jî hatine kuştin.