​​​​​​​Meclisa Leşkerî ya Girê Spî: Em di rizgarkirina herêmên dagirkirî de bi israr in

Fermandarê Meclisa Leşkerî ya Girê Spî Riyad El Xelef der barê salvegera 4'emîn a dagirkirina Girê Spî û Serêkaniyê de ya ji aliyê dewleta Tirk a dagirker û çeteyên wê ve axivî.

Riyad El Xelef anî ziman ku dewleta Tirk a dagirker piştî dagirkirinê piraniya şêniyên kantonê koçber kirin, herêm kirin devereke ewle ji bo komên terorîst û vejandina çeteyên DAIŞ′ê. Her wiha diyar kir ku dewleta Tirk a dagirker piştevanê yekemîn ê terorê ye û piraniya çeteyên DAIŞ′ê di rêya sînorê Tirkiyeyê derbasî Sûriyeyê bûn.

El Xelef got, piştî serkeftina projeya Rêveberiya Xweser û têkbirina DAIŞ'ê ji aliyê QSD'ê ve, dewleta Tirk a dagirker destwerdana leşkerî ya rasterast da destpêkirin û Efrîn, Girê Spî û Serêkaniyê dagir kirin. Riya El Xelef got, dewleta Tirk armanc dike çeteyên DAIŞ′ê biparêze û herêmê bixe rewşeke bê istiqrara ewlehî û aborî.

El Xelef diyar kir ku dewleta Tirk a dagirker piştî dagirkirina bajarên navborî dest bi koçberkirina şêniyên wê û guhertina demgorafî kir û  wiha li axaftina xwe zêde kir: "Dewleta Tirk a dagirker û çeteyên wê gelek komkujî li dijî gelê me pêk anîn, kiryarên revandinê û standina fidiyê pêk tîne. Her wiha zeviyên çandiniyê dişewitîne û binesaziya herêmê nexasim stasyonên av, kehrebe û petrolê wêran kir, li ser rêya navneteweyî ya M4 sivîlan dike hedef û bi domdarî li qadên sivîlan dide. Di heman demê de balafirên keşfê bi domdarî li ser herêmê digerin."

El Xelef bal kişand ku dewleta Tirk a dagirker û çeteyên wê di bûyerên dawîn ên li Dêrazorê de êrişên xwe li ser li dijî gundewarê Minbicê û gundên Eyn Îsa û Til Temirê zêdetir kirin da ku zexta ji ser komên çekdar ên hikumeta Şamê yên li Dêrazorê sivik bike û got: "Bi saya hişyarbûna gelê me û piştgiriya wê ya bi QSD′ê re me, planên bi armanca vejandina terorê û afirandina rewşeke tevlihev li herêmên Bakur û Rojhilatê Sûriyeyê têk birin."

El Xelef anî ziman ku roj bi roj îsrara wan a şopandina rêya şehîdan û rizgarkirina deverên dagirkirî zêde dibe û wiha dom da axaftina xwe: "Bila dilê gelê me rihet be, hêzên me amade ne herêmê ji dewleta Tirk a dagirker, çeteyên wê û tevahî çavbirçiyên xêr û bereketa welatê me biparêzin."

Fermandarê Meclisa Leşkerî ya Girê Spî Riyad El Xekef di dawiya axaftina xwe de ev name da şêniyên li herêmên dagirkirî: " Em ji şêniyên xwe yên li herêmên dagirkirî re dibêjin; çawa me berê herêm ji terora DAIŞ′ê rizgar kirin û me çete neçar kirin ku ji herêmê dekevin,  zarokên we yên di nava QSD′ê de amade ne giyanê xwe di rêya rizgarkirina we ji Osmaniya dagirker û rakirina zulma li ser we de bidin."

(mh/bb)

ANHA