​​​​​​​Şehîd Rêzan Mistefa û şehîd Candar Oskîlo hatin oxirkirin

Şêniyên taxên Şêxmeqsûd û Eşrefiyê cenazeyên Rêzan Mistefa û Candar Oskîlo yên 8′ê Cotmehê di êrişên hewayî ya dewleta Tirk a dagirker a li dijî Akademiya Hêzên Têkoşîna li Dijî Madeyên Hişbirê ya li Dêrikê de şehîd bûbûn, duh êvarî pêşwazîkirin û îro bi merasîmkeê li Goristana Şehîdên Berxwedana Şêxmeqsûd û Eşrefiyê spartin axê.

Bi hezaran şêniyên Şêxmeqsûd û Eşrefiyê ji pêşiya Nexweşxaneya Şehîd Xalid Fecir a li beşê rojavayê taxa Şêxmeqsûdê wergirtin û bi dirûşmên tolhildan û dilosiya bi şehîdan re berî dan goristanê.

Li goristanê deqeyeke rêz hat girtin û rêvebera Meclisa Malbatên Şehîdan Roşan Mihemed daxuyaniya meclisê xwend.

Di daxuyaniyê de dagirkirina Serêkaniyê û Girê Spî û êrişên dewleta Tirk a dagirker ên li ser Bakur û Rojhilatê Sûriyeyê wekî berdewama komploya navneteweyî ya li dijî Rêber Abdullah Ocalan hat nirxandin û hate gotin, armanc ji van êrişan dûrxistina Rêber Abdullah Ocalan ji gelê azadîxwaz û qirkirina gelan e.

Di dauxyaniyê de bêdengiya navneteweyî, DYA û Koalîsyona Navneteweyî ya li dijî DAIŞ û hikumeta Şamê ya li hemberî êrişên dewleta Tirk a dagirker ên li ser Bakur û Rojhilatê Sûriyêyê hat şermezarkirin û hate gotin ev bêdengî dihêle ku dewleta Tirk komkujiyên xwe li dijî gel zêdetir bike.

Di daxuyaniyê de bang li gelên Bakur û Rojhilatê Sûriyeyê hat kirin  ku destkeftiyan biparêzin.

Ji fermandarên Hêzên Ewlekariya Hundirîn Qehrema Bekir jiyana her du şehîdan vegot: "Dema şerê li Şêxmeqsûd û Eşrefiyê, şehîd Rêzan heta rizgarkirina her du taxan şer kir. Şehîd Candar ne dûrî wî bû, tevî ku ne ji zûde tev li Hêzên Ewlekariya Hundirîn bûbû, lê kedeke mezin da. Em ê her tim behsa herdu şehîdên xwe bidkin. Hewldanên her du şehîdan ji bo pêkanîna aştî û ewlehiyê bû. Êrişên dagirkeran û fedakariyên zarokên me wê herkîna dîrokê biguherînin û dê bi teqez serkeftin para me be."

Bi navê malbata şehîda Rêzan, Hemîd Mistefa jî bal kişand ser hevgirtina gel û hêzên wê û got: "Ev kombûna nîşana girêdana xurt a di navbera gel û hêzên wê de ye. Em ê li derdora hêzên xwe bin û gav bi gav ber bi serkeftinê ve biavêjin."

Hevrêyê şehîd Rizan û Candar stranek diyarî şehîdan kir.

Piştre wesîqeyên şehîd Rêzan Mistefa û şehîd Candar Oskîlo hatin xwendin û radestî malbatên wan kirin. Cenazeyên her du şehîdan li Goristana Şehîdên Berxwedana Şêxmeqsûd û Eşrefiyê ya li herêma Şiqêf hatin veşartin.

(bb)

ANHA